Гастрольләрдә (+фоторепортаж)

Үзем дә шул клубта член булып торам. Барлык чараларны да фотога төшерәп барам. Кайберләреннән видеоязмалар да бар. Аларны эзлекле рәвештә үземнең шәхси электрон архивыма урнаштырып барам. Шушы мәшәкатъләр аркасында фотоларда үзем еш күренмим, сәхнәгә чыгарга да җай чыкмый. Әмма Балтач сәхнәсендә чыгыш ясамасам да җәйге "гастрольләргә" чыгып киткән кебек булдым.

Иң беренче чирканчык ике ел элек Чаллыдагы "Энҗе бөртеге" шифаханәсендә булды. Җыр-биюгә оста булмаганга, бик чакыргач, берничә кызык хәлне сөйләп күрсәттем. Ул ял итүчеләр көче белән оештырылган концертта булды. Анда катнашкан һәркемгә шифаханә рәсеме төшерелгән кружка бүләк иттеләр.

Быелның май аенда Зәй шәһәре янындагы бик матур урман эчендә урнашкан "Ялта-Зәй" чаңгы спорты үзәгендә Татарстанның "Электр челтәрләре компаниясе" ветеран энергетикларының өченче форумы булды. Шунда ук (монысы әле беренче тапкыр) үзешчән сәнгать һәм кул эшләнмәләре буенча конкурслар оештырылды. Безнең вокаль ансамбль дипломга лаек булды. Ике көн бик күңелле ял иттек, сыйландык, башка районнардан килгән хезмәттәшләр белән аралаштык. Скандинавиялеләрчә йөрү буенча инструктаж уздырдылар, мастер-класс күрсәттеләр, һәркемгә берәр комплект универсаль таяк бүләк иттеләр.

Һәм менә июнь ахырында гына үзем эшләп чыккан Энергосистеманың "Балкыш" шифаханәсендә булып кайттым. Монысында ял итүчеләр катнашындагы концертка бераз әзерләнеп барган идем, юкка булмаган, кул чаба-чаба тыңладылар.

"Энҗе бөртеге" шифаханәсендә ял иткәндә Ильназ Минвәлиевның әти-әнисе Рәшит-Разия,

элеккеге сәламәтлек саклау министры Айрат Фәрраховның әтисе Зәки ага белән ял иттек. Ул вакытта ял иткәнне тасвирлап язган язмам "Татарстан яшьләре" газетасында басылган иде.

Быел тагын Зәки ага белән ял итәргә туры килде. Аңа быелның 5 декабрендә 90 яшь булачак икән! Алар белән әле дә элемтәдә торабыз.

Вагиз Таҗиев