100 аресозь – кӧня ке вамыш

Пересьмон даур — со котьку кыӵе ке аспӧртэмлыко мылкыдэн тырмем вакыт. Макем капчи но сайкыт али арлыдоослы, со ваньмыз пинал дыръязы адӟем шуг-секытъёс понна берыктэм дун.

Ма гинэ эн вералэ, пересьёс — со дунъянтэм шуныт но капчи мылкыдэн тырмем адямиос, соос котьку тӥледыз кунояны, утялтыны дась. Соосын вераськон — нимысьтыз уж, сюлэм гуръёсты кисьтон. Куддыр паймоно кадь: сыӵе секыт улон пыр ортчыса, соос али но ненег сюлэмзэс ворсаны уг дырто, весь каньыл мылкыдэн уло но котькуд нуналэз тау карыса пумитало. Кытысь шедьтыны кулэ кужым? Соос асьсэос ик верало: «Матысьёслэн улонзы капчигес мед луоз, нылпиос кӧттыр мед будозы». 

Туэ пӧсьтолэзьлэн шораз Кумаева Зоя Петровналэн но улоназ бадӟым лыдпус — 90 арес. Осконтэм кадь, но та сюресын кӧня сюлэм чигиськонъёс, шумпотонъёс, шуг-секытъёс, вормонъёс, усёнъёс — лыдъянтэм. 

Пальпотӥсь ымнырын, шумпотыса пумитаз монэ Зоя Петровна. «Ӵапак чай пуктӥсько вал, ачим газэз лэзьыны кышкасько, тани тон пукты али, собере чай юом», — шуиз песянай. «Электроплита басьтыны малпасько, кылдэм ке. А то отын но татын газ пуштэм шуыса верало, соин кӧшкемасько огнам луыку чайник пуктыны. Учкы али кыӵе бадӟым каризы монэ: тани открытка кузьмазы, чебер сяська но сётӥзы, куноос лыктон азьын ёросысь дурбасьтонъя ёзэтын ужасьёс утялскыны лыктӥзы. Ураган кадь котыр миськизы, ваньзэ ӵужизы, асьсэос но ӧз валалэ кадь, кытчы мае тыремзэс», — серекъяса вераз юбилярша. Кӧня ке вакыт ортчыса, семьяез, анай-атаез, пинал дырыз сярысь юанъёс кылдӥзы. Ӧжытак малпаськыса, Зоя Петровна, синкылиен тырмем синъёссэ ӵушылыса, тодэ ваёнъёссэ вераны кутскиз.

Берытском азьло дыре. 1934 ар... Ципья гурт... Радызъя мынӥсь но сяськаяськись Анастасия но Пётр Кумаевъёслэн семьяязы вордӥське шоретӥ нылпизы. Солы чебер но пуштросо ним сёто — Зоя. Табере семья трос нылпиё луиз: Матрёна но Анатолий борды муспотон сузэрзы итӥськиз. Таин гинэ кузпалъёслэн сюлэмзы уг буйгатскы, бадӟым семья эшшо но шудогес луэ: вордӥсько на Елена нылзы но Геннадий пизы. 

Бадӟым семья, котькуд ужез дэмен, огазе лэсьтыса, шудо азьпал улон сярысь лемлет малпанъёсын улӥз. Азьло вакытысь адямиос тужгес семьялэсь тыр луэмзэ но адями кусыпъёсты дунъязы. Озьы ик татын но: тынӥсь улон, дышетскон сюрес, но ваньмыз та озьы ик малпанъёсын гинэ кылиз...

1941 ар... Котькинлы тодмо вакыт. Семьялэсь шорсюлэмзэ, пыкетсэ но тыршисьсэ — Пётрез — фронтэ басьто. Туж секыт ивор быдэс семья понна. Таин шудо тыр семьялэн улонэз воксё мукет ӧръя кошке. Семьялы дышетсконо улыны асьсэ понна гинэ...

— Туж секыт вал та дыре. Ой, тодэ вайыны ик секыт, сютэм но улӥм, вераку сюлэм ик чигиське. Кызьы анаймы чидам, дыр, уг валаськы, — синкыли пыр вераны кутскиз Зоя Петровна. — Самой ческыт нылпи вакытэ ик семья пазяськиз, чигиз ук. Со яра али но уг бурмы сюлмын, весяк улонам кыстӥське ини. Весь сое малпаса улӥсько. Анае — Анастасия Сергеевна — быдэс улонзэ колхозын тыршиз, валтӥсь ужез бере милемыз но утьыны кулэ вал, юртъер котырысь ужъёсты быдэсъяз, миелмыз пыд йылэ султытыны тыршиз. Мон 5-тӥ классэз йылпумъяй но ужаны кутски. Бадӟымез апаймы висьыса кулӥз. Со колхозын ужаз, парсьёсты сюдӥз...

Собере кышномурт Балтасьысь пекарняе ужаны интыяське. Татын ик солэн ужан сюресэз ортче. Со вискын вить ар ӵоже нылпиосты утьыны но вутске на. «Соку ужан вакытысь эшъёсы пӧлысь мон огнам кылиськем кадь ини. Адямиос кошко, соосын ӵош быдэс даур но валлянае кыле», — шуэ Зоя Петровна.

Аслэсьтыз нылкышно шудзэ шедьтыны луонлык кылдымтэ ке но, Зоя Петровна туннэ нуналэ ассэ шудо адямиен лыдъяны быгатэ. Вордскем нуналаз Башкириысь сузэрез но бертэм. «Ӵапак толон гтнэ (вераськонмы 22 пӧсьтолэзе ва — Ю. Щ.) кошкиз али, кузьымъёсын ик бертӥз», — шумпотонзэ ватытэк ватсаз Зоя Петровна. Сое утялтыны ёросысь дурбасьтонъя ёзэтысь Гульсина Галиева но ветлэ. Аслэсьтыз утялтӥсьсэ песянай туж кельшытэ, ушъя. 

— Туж умой кышномурт, ваньзэ ӝикыт, чылкыт возе. Сиён но пӧзьтэ, кулэ луиз ке сиён-юон но вае. Вордскем нуналам но трос гинэ ваем. Аслэсьтыз матысьсэ кадь уте. 

Бускельёсыныз но Зоя Петровна туж ӟеч кусыпъёс возе. Верамезъя ик шуныт мылкыд шӧдӥське, вань сюлэм шунытсэ но таукаронзэ возьматыса соос сярысь вераны кутскиз.

— Номыр начарзэ вераны уг быгатӥськы. Туж умой бускельёсы, семьязы но туж ӟеч. Кышноез узыр ӝӧк дасяз куноос лыктон азьын, нош пиосмуртэз котыр радъя, вань косонъёсме быдэстэ, кышноез ужын луыку, ачиз сиён но пыртылэ. Инмарлы тау, та быдӟа аресам вуыса, котырам юрттӥсь адямиосы вань. Азьвыл квартираын улыкум, урод малпанъёсын адямиос бускельын вал, али улонлы шумпотыса улӥсько. 

Зэмзэ но, Зоя Петровналэн пичи гинэ квартираяз туж ӝикыт но чылкыт, котькуд арбери аслаз интыяз, пичи гинэ телевизорез но шобыртэмын. Улонысь шуг-секытъёссэ но ыштонъёссэ со воштэ шумпотонъёсын но капчи мылкыдэн. 

— Ваньмыз вань: ӝӧк вылын нянь, дыраз коньдон сёто, небыт валес, чылкыт омыр. Мар кулэ на? Украинаын мынӥсь жугиськон но чальгес мед быроз ни вал. Ваньзылы но тынӥсь улон сӥзисько, тэльмыронъёс, курадӟонъёс медаз луэ дунне вылын.

— Тӥледлы но кема улыны, 95 но 100 аресъем юбилей лыдпусъёстэс пумитаны мед кылдоз на, ми одно ик вуом, — шуи мон келяськыку Зоя Петровналы.

— Таӵе сайкыт дуннеысь кошкем ик уг поты, кыӵе тынӥсь улон али, — шуыса келяськиз песянай. Нош мон кема малпаськыса пуки на: вал меда кышномуртлэн шудо вакытъёсыз? Зэмзэ ик-а сюлэмыз солэн буйгамын? Ӧйтӧд, но солэн пиштӥсь синъёсыз али но улонлы кыстӥсько на, соин оскон кылдэ — со 100 арессэ пумитаны соглаш! 

Котьку улонды сяськаяськись мед луоз, Инмарен сётэм аръёсты шудбурен мед тырмозы, Зоя Петровна!

Туспуктэм: А. Гатиятуллина.