Гужем референдумен кутскоз

Поселениосын гуртъёсты благоустроить, урам-тыкырыкъёсысь сюресъёсты, выжъёсты, водопроводъёсты ремонт карон, шайёсты радэ пыртон понна выт люкан (самообложение) кемалась вань ини. Котькуд гуртын люкаськем уксёлэн быдӟалаез пӧртэм. Меӵак гурт поселенилэн кичӧлтэмезъя люкам уксё интыысь бюджетэз тырмытыны но чыры-пыры кулэяськонъёслы гинэ кутӥське вал. Нош 2013-тӥ арын ноябре Татарстан Республикаысь Министръёслэн Кабинетсы гражданъёслэсь самообложенизэс 1:4 пропорциен ватсаса финансировать карон сярысь постановление кутӥз. Мукет сямен вераса, адямилэн сётэм 1 манет уксёез вылэ республикалэн казнаысьтыз эшшо 4 манет ватсаськоз. Та одӥг адямилэсь 5 манет луэ шуэм кыл. Но сое юнматон вылысь интыысь власть калыклэсь согласизэ басьтон понна референдум ортчытыны кулэ. Нош референдум, огшоры кылын гинэ верано ке, со - быръён.

Балтась районысь гурт поселениосын самообложениея референдум 1-тӥ июне ортчоз. Отчы 18 арес тырмем, со ик гурт поселениын улӥсь (пусъем) гражданъёс пыриськыны быгато. Референдуме калыклэн 50 процентэз пыриськиз но солэн ӝыныез самообложениея выт люканлы соглаш луиз ке, референдум ортчиз шуыса лыдъяське.

- Озьы 1-тӥ июне гурт калык улоссэ чебертон понна аслэсьтыз люкетсэ пыртыны соглаш луэмзэ-луымтэзэ куара сётон амалэн быдэстоз. Мынам малпамея, вордскем гуртэзлэн патриотэз луэм котькуд мурт, референдумлэсь кулэлыксэ валаса, соглаш луэмзэ вералоз. Сюресъёсмы умой, юбоосын тыл ӝуа, мыным та куара сётон малы кулэ шуисьёс уз луэ шуыса малпасько. Ёросмес чебертон, каньыл улон понна луонлыкъёс кылдытон ужпумъёсты трос ӝутӥськом, табере кылысен уже выжыны дыр вуиз шуыса малпасько, - шуэ районлэн главаезлэн воштӥсез Наиль Сабирзянов.

- Референдум нуналэ быръён участокын котькуд гражданин бюллетень басьтэ. Нош отын самообложенилэн суммаез гожтэмын луыны кулэ но адями «соглаш» яке «ӧвӧл» шуэм ответэз быръёно луэ. Туннэ нуналлы Балтась посёлок понна нырысетӥ быдэстоно ужпум - со шутэтскон парк кылдытон. Кылем сӥзьыл уж ӧжытак быдэстӥськиз ке но, бератаз, коньдон луымтэен, дугдытэмын вал. Балтась посёлоклэн центраз нылпиос понна шудон площадка кылдытӥськиз. Нош фонтанъёсын, тусо тылъёсын но пӧртэм функцием спортивной сооружениосын площадка али кагазын гинэ. Та учыре посёлокамы улӥсь котькин умой ответ сётоз шуыса оскисько, - шуэ Балтась посёлоклэн исполкомезлэн кивалтӥсез Ильдар Габдрахманов.

Калыклэсь люкам но ватсаса республикалэн казнаысеныз пырем уксёлэн котькуд коньыез юн контроль улсын луоз. Сое референдумын пусъем ужпумлы сяна, мукет удыслы кутон чурыт алӥське. Калык но кыӵе ужъёсты нырысь ик быдэстон пумысен ас кылзэ вераны кулэ. Гурт поселенилэн главаез арлы одӥг пол та уксёлэн кутӥськемезъя калык азьын отчёт лэсьтоз.

Республика кивалтэт гуртъёслэсь проблемаоссэс сэрттон-пертчон понна ватсаса уксё сётӥсько шуыку, районысь одӥг гинэ гражданин но 1-тӥ июне ортчоно референдуме пыриськытэк медаз кыльы. Лыдӟисьёсмы та сярысь ма малпало меда? 2-62-53 номеро телефонъя редакцие яке газетлэн электронной почтаяз BaltasiRed2005@yandex.ru, baltaci.ru сайтаз пырыса малпанъёстэс кельтыны яке «в контакте» социальной сеть пыр иворъёстэс лэзьыны быгатӥськоды.