«Котькуд муртлэн аслаз кизилиез...»

«Котькуд муртлэн аслаз кизилиез...»

... Анай кыл — улонэ нырысь вамыш,

Сотэк уд лэсьты мукетсэ вамыш.

Анай музэн,

Анай кылыд юрттоз,

Улон сюрес кузя йыгмыт валтоз.

Бадӟым шуръёс кутско ошмесысен,

Нош вераськон кутске

Анай кылэн.

Умой ӧд ке вала анай кылэз,

Ѓечгес уд тоды тон мукет кылэз...

Котькудмылы тодмо кылбурысь басьтэм та чуръёсты удмурт кыллэн гимнэз шуыны луэ. Нош авторзэ — Флор Иванович Васильевез — удмурт литературалэн классикеныз. Нош солэн творчествоез — калыклэн историез, лулчеберет узырлыкез. Ӵемысь сое удмурт Есенин шуыса но верало. Солэн кылбуръёсыз — вордскем музъем сярысь, инкуазь но яратон сярысь кылбурет. Туж аспӧртэмлыко, нокинлы тупасьтэм, мур малпаськись, котьку ас кизилиезлы оскымон луыса кылись кылбурчи.

19 феврале Флор Иванович Васильевлы (1934-1978) 85 арес тырмысал. Вордӥськиз со Удмуртиын, Яр ёросысь Бердыши гуртын. Глазовысь педучилищеез йылпумъяз, 1958 арын — пединститутэз. 1962 арысен куать ар ӵоже «Комсомолец Удмуртии» район редакциен кивалтӥз, 1967-1968 аръёсы «Советской Удмуртия» газетлэн редакторезлэн воштӥсез вал. Берпуметӥ аръёсаз «Молот» журналлэн редакторез но Удмуртиысь писательёслэн Союззылэн председателез луиз.

Кылбуръёс гожъяны кутскиз педучилищеын дышетскыкуз. 1960 арын потӥз нырысетӥ удмурт кылын «Ворекъяло кизилиос» сборникез, 1967 арын - нырысетӥез ӟуч кылэ берыктэмъёсын сборникез («Лирика»), 1971 арын солэн кылбуръёсыз нимысьтыз книгаен поттэмын вал Москваын. Улэп дыръяз потӥзы солэн удмурт кылын сизьым сборникез но витез ӟуч кылын.  Ӟуч кылэ сяна, кылбуръёсыз уно пӧртэм мукет кылъёсы берыктэмын, кылсярысь, украин, болгар но мукетъёсыз.

«Тон сярысь» книгаез понна 1967 арын кылбурчилы сётэмын Удмуртиысь Комсомоллэн премиез, 1978 арын «Времена жизни» но «Куар усён толэзе» — Удмурт АССР-ысь Государственной премиен пусйиськиз.

Яркыт литературной творчествоез но общественной ужъёсыз понна Флор Васильев «Знак почёта» орденэн пусъемын.

Флор Васильевлэн нимыз сётэмын Глазов городысь одӥг урамлы. Солы сӥзем мемориальной пул пуктэмын солэн улоно корка вылаз, озьы ик пединститутлэн дышетскон корпус вылаз. Вордскем дырысеныз 80 ар тырмонэн валче Яр ёросын Флор Васильев нимо Премиос кылдытэмын. 85 ар тырмон лыдпусэн валче но Удмуртиын, нимаз ик кылбурчилэн вордскем палъёсаз, пӧртэм ужрадъёс тодмостэмын, кылсярысь кылбур лыдӟисьёслэн конкурссы. Озьыен, удмурт калык пизэ уг вунэты ас дано пизэ, уг вунэты солэсь кылбуръёссэ, оске, котькуд муртлэн аслаз яркыт кизилиез ӝуа шуыса.

Екатерина Салтыкова