Кысэм кизилилэн югытэз

Котькуд калык ас шаерезлэсь чеберзэ ас сяменыз данъя. Котькудӥз тырше котырысьтыз калыклэсь улэм-вылэмзэ чакласа вераны, калыклэсь мылкыдзэ, куректонзэ, сюлэмшугъяськонъёссэ, шумпотонъёссэ быгатыса возьматыны но сое шараяны юрттэ.

Одӥгез соос пӧлысь кылтэчымы асьме улосчимы Николай Михайлович Никифоров.

Николай Никифоров вордскиз1954-тӥ арын 21-тӥ шуркынмонэ Татарстан Элькунысь Балтась ёросысь Вуж Турья гуртын. Ӟучъёс та нуналэз Михайлов день шуо вылэм.

1962 арын Вуж Турья гуртысь покчи арьем школае соос дас куинь кузя дышетскыны пыро.

1966 арын дышетсконзэ азьланьтэ Шор Кушкет (Ӟаны) гуртысь тямыс классъем школаын.Классазы ортчись котькыӵе ужрадэ мылысь-кыдысь пыриськылэ. Пионерской дружиналэн советаз но бадӟым люкет пыртэ.

Озьы ик тыршыса дышетсконзэ Киров улосвылысь Савальской сельхозтехникумын азьланьтэ, зоотехниклэсь дипломзэ басьтэ. Та удысын ик ужаны басьтӥське. Уно аръёс ӵоже Киров улосвылысь Кильмезь районысь Бураши гуртын пудо вордон удысын тыршыса ужа. Берло аръёсы берытске ас вордскем Вуж Турья гуртаз.

Ӟаны шор ёзо школаын дышетскон аръёсаз ик гожъяськон сюресэ вамыштэ со.

Дас ньыль арес тырмыса солэн нырысетӥ «Ӟольгыри» кылбурез «Дась лу!» газетын потӥз, лыдӟисьёс доры сюрес шедьтӥз.

Берло аръёсы солэн кылбуръёсыз печатласько «Дась лу!» но ёросысь «Азьлане» газетъёсын. Тросэз веросъёсыз печатласькизы «Дась лу!» газетын. Со гожъяз кылбуръёс, веросъёс, басняос, мадёсъёс, юморескаос, вань солэн повестьёсыз, ас аспалъёсыз сярысь очеркъёсыз. Тросэз поталлязы «Азьлане» газетамы. Лыдӟисьёс солэн произведениосынызы тодматскизы «Удмурт дунне» газетысен, «Инвожо», «Кенеш» журналъёс пыр. Гожъяськон-веран ужлы ӧз дышетскы ке но, туж усто пӧрмылӥзы солэн ужъёсыз. Солэн произведениосыз пыр тодӥськом асьме калыклэсь этнографической историзэ.

Туж паськыт, пуштросъем солэн шаерлэн узырлыкез но чеберлыкез сярысь гожъямъёсыз. Николай Михайловичлэн гожъямысьтыз тодматскиськом асьме шаерысь огшоры адямиослэн лулчеберлыкенызы. Паймоно кадь солэн туж мур, котырласянь асьме удмурт калыклэсь лулчеберлыксэ усьтыны быгатэмезлы: ужаны, улыны тыршемзэс быгатыса возьматэмезлы.

Татысен адӟиськом макем паськыт но бадӟым сюлэмо луэм Николай Никифоров.

Солэсь очеркъёссэ люкетэн-люкетэн висъяны луэ.

Нош али шӧдӥськом та бадӟым адямилэсь кысэмзэ. Али газетлэн бамъёсаз шер пумиськыло удмурт гожъясьёслэн произведениоссы.

Туж шумпотыса ми усьтӥськом куинетӥ классысь лыдӟон книгаез. Отын но «Калык кылос» люкетэз усьтэ Николай Никифоровлэн чуръёсыз, кудъёсыз мылкыдэз инмозь бурдъяло:

Таӵе чуръёсты лыдӟыса, амалтэк выжыкыл дуннее пыриськод…

Бадӟым мылкыдын лыдӟиськом мур пуштросо кылбуръёссэ. Солэн «Инкуазь» сярысь гожъям узыр но тунсыко материалъёсыз дышетон удысын но юртто.

Николай Никифоров кылбуръёссэ сӥзиз школаын дышетскись пиналъёслы, егитъёслы. Соослы визь-нод сётэ инкуазез утьыса возьыны. Калык понна сюлмысь ужаны, юн эшъяськыса улыны.

Сюлмысен данъяськиськом Балтась ёросысь калык пӧлын но таӵе адямиос вань шуыса.

Материалэз люказы но гожтӥзы Шор Кушкет школаысь покчи классъёсын ужась дышетӥсьёс:

Асакова Л.А., Евдокимова Г.Б., Игнатьева Л.И., Уськеева Н.М.