Луэмзэ возьмаса, азьлань гинэ

Котькуд гуртын та праздник нимысьтыз пусйиськиз, дыр. Кытын ке концерт пуктӥзы, кытын ке ӵошатсконъёс радъязы, кытын ке ожысь ветеранэн пумиськон но вераськон ортчиз. Вераны кулэ, соослэн ваньзылэн ужпумзы одӥг — будӥсь поколенилы патриот мылкыд пыӵатыны но спортэн эшъяськыны мылкыдзэс ӝутыны.

Улисьял гуртын асьсэ йылолзэс туэ но ӧз вунэтэ: соос арлы быдэ, Атыкай музъемез утисьлэн нуналэзлы сӥзьыса, куасэн тунсыко ӵошатсконъёс радъяло. Та палъёсысь нылпиос куасэн бызьылонэн туж тунсыкъясько, соин но куасэн бызьылӥсьёс пӧлын Улисьял гуртысь пиналъёслэсь нимъёссэс адӟыса, паймоно уг луы. 

Куасэн ӵошатсконъёс туэ но шулдыр, капчи мылкыдын ортчизы татын. Валтӥсь радъясьёсыз котьку сямен Виктор но Лада Фёдоровъёс луо, гуртлэн азьветлӥсьёсыз. 

— Азьло аръёсын ӵошатыса, пиналъёс али лябгес ини. Азьло туж трос калык люкаське вал, пичиез но, бадӟымез но. Али тросгес школаын дышетскисьёслы саклык висъяно луэ. Ужрадлэн валтӥсь спонсорез «Активист» возёс (кивалтӥсез — Рафиль Закиев) луиз, озьы ик юрттэт сётӥз Кугунур поселенилэн главаез Руслан Егоров. Ильгам Гайнутдинов но пыриськиз та ужрадэ. Лыктэмъёсты куноян, пумитан ужпумъёс лулчеберет удысын ужасьёс но гуртлэн азьветлӥсьёсыз вылэ усиз. Пыриськисьёс сярысь ке верано, тросэз милям гуртысь но Ципья гуртысь вал. Шумпотымон: таӵе ужрадъёсы пичиос но мыло-кыдо пырисько. Вань вормисьёс но призо инты басьтэмъёс нимысьтыз медальёсын но кузьымъёсын пусйиськизы, — ивортӥзы ужрадэз радъясьёс.