СООС ОРДЕНЭН БЕРТӤЗЫ

Но котьку сюлмамы улоз, ноку уз вуны ожысь солдатъёслэн, гуртъёсын но городъёсын улӥсьёслэн лэсьтэм подвигъёссы. Быдӟым Отечественной война возьматӥз, куке одӥг солдат яке офицер быдэс армилэсь улонзэ утиз, Вормонэз матэктытӥз. Ми, Ӟаны шоръёзо школаысь «Даур куара» шаертодонъя музейысь Кенешлэн ёзчиосыз, туэ школа микрорайонэ пырем гуртъёсысь войнае ветлэмъёс сярысь «Соос орденэн бертӥзы» проект дасямы. Али шедьтӥмы ог дасо орденэн бертэмъёсты. Соос пӧлысь тодматом куиненыз.

Красноармеец Кунаев Михаил Прокопьевич вордскемын 1909 арын Ӟаны гуртын. Горд Армие басьтэмын 29 июне 1942 арын, нырысетӥзэ оже пыриське 10 июле 1942 арын. Куинь пол сӧсырмылэмын.Кёнигсберг город азьысь Такенвальде гурт дорын 6 апреле 1945 арын немецкой фашистъёсын лек ожмаськонын тушмонлэн оборонаезлы пумит нырысетӥ луыса атакае потэ. Гранатаеныз пулемётэз пуштытыса, отделениысь боецъёслы азьлане сюрес усьтэ. Кышкасьтэм, батырлыко луэмез понна , Кунаев куинетӥ степенё «Слава» орденэн пусйиське. Озьы ик 16 апреле 1945 арын Кабабульде гурт котырын вылысь атакае потэ но, 3 гитлеровецъёсты быдтэ. Та подвигез понна красноармеец Кунаевез «За отвагу» наградить каро.

Ӟаныын ик 1907 арын вордскем Кабатуев Егор Терентьевич Горд Армие басьтэмын 12 августэ 1941 арын1018 ОКШР 23А ротаын службазэ кутске. Красноармеец Кабатуев та ротаез кылдытэм дырысен службазэ линейной надсмотрщик луэ. Смоленск но Витебск палъёсын аслаз участоказ туж умой быдэсъя командованилэсь косэмзэ. Артиллерилэн зол ыбылэменыз ӵем тӥяськыло кусыпъёс. Кабатуев котьку висъяськылӥз учыръёсты шонер валаменыз, визьмо кенешъёс сётэменыз. Берло дыре со ездовойын тырше, мыло-кыдо утялтылэ валъёсты. 7 сентябре 1941 арын ожмаськонын кышкасьтэм луэмзэ возьматэмез понна Кабатуев «Горд Кизили» орденэн пусйиське. Та ожын аспалмы секыт сӧсырмыны шеде.

Прокопьев Иван Сергеевич - Кисаль пи. Вордскемын 1913 арын. Войнае басьтэмын 1942 арын. Красноармеец Прокопьев Домбровской Богдан Хмельницкий ордено дивизилэн 1013 стрелковой полказ стрелок луыса ожмаське. 7 пол сӧсырмыны шеде. «Прокопьев эш ассэ туж адӟем карымон, кылзӥськисен возьматӥз, приказъёсты котьку ӟеч вуттыса быдэсъя. Ожъёсын асьме Родинамылэн эрикез понна улонзэ сётыны дась. Одӥгаз ожын 5 фашистъёсты кутӥз. Кышкасьтэм, батыр сюлмо, аслаз калыкезлы, Родинаезлы оскымон луэмез понна наградить кароно « Горд Кизили» орденэн», - пусъемын командирен кинюртэм наградной листаз.

Азьланяз тодматом мукетъёсыныз орденэн бертэмъёсын. Ноку ум вунэтэ Вормонэз вайисьёсты!

«Даур куара» шаертодон музейысь Кенешлэн ёзчиосыз