Шурапайлы нош ик «дас тямыс»!

Куке луонлык кылдэ арлыдоослэсь дано лыдпуссэс пумитамзы сярысь гожтыны, соку ик сюлмын но буйгатскон, шумпотон каръяське кадь. Соос, трос секытъёс но курадӟонъёс пыр потэмъёс, пальпото выль нуналлы но шумпото тыр семьязылы.

Бускель Лельвиж гуртын вордӥськем но будэм кышномурт улонзэ бызем Кушкет гуртаз ортчытэ. Кышномурт вань улон сюресаз эскеронъёс пыр потэ, озьы ке но улонлэсь зэмос «шӧмзэ» со вала но ас сюресаз дано вамышъёс лэсьтэ.

Со — кузпал, анай, песянай, мар луоз на дунне вылын солэсь дуногес?

Нош мар воштӥськиз Шурапайлэн улоназ куинь ар куспын? Со эшшо но узыргес луиз. Внукъёсыз солы эшшо 5 правнукъёсты кузьмазы. Табере солэн дас внукъёсыз но дас куать правнукъёсыз. Узыр песянай талы туж шумпотэ но мылкыдъёссэ уг ваты. 

Дано юбилейзэ пусйыны песянай доры вуизы «Яна тормыш» акционер обществолэн председателез Раниль Габдрахманов но Янгул гурт поселенилэн главаез Рамиль Гильфанов. Гумырзэ колхозын, гурт понна тыршем кышномуртлы соос тӧдьы мамык шаль, сяська керттэт но ёрос главалэсь данъян гожтэтсэ вайизы. Куноосты Александра Кузьминична ӝутскем мылкыдэн но тау карыса пумитаз, шуныт кылъёссэ вераз но ваньзылы каньыл, сӧл-таза улыны сӥзиз. Нош лыктэм куноос юбилейзэ пумитась нылкышнолы кузь гумыр, тазалык но каньыл улон сӥзизы. Эшшо трос дано лыдпусъёссэ пумитаны мед мед кылдоз на Шурапайлы!

Аслэсьтыз дано лыдпуссэ со семьяез пӧлын пумитаз: Иван пиез, Елена кенэз но Ярослав внукез сое яратыса но шуныт кылъёсын ӟечкылазы вордӥськем нуналэныз. Мукет нылпиосыз но солы сюлмысь веранъёссэ вуттӥзы. Вордэм анайзылы шудбуро улон сӥзизы.

Шурапай туж капчи мылкыдо но лад-лад вераськись кышномурт. Кӧня ке ар талэсь азьло гуртысь клубе со аслэсьтыз гожъям кырӟан гуръёссэ сётӥз. Пересьёс вань дыръя, визьмо веранъёссэс гожтыса кельтыны кулэ. Соин тодматэме потэ Шурапайлэн гожтэмъёсыныз. Егитъёс понна но туж тунсыко луоз удмурт калык лулчеберет мерасэз тодыса но утьыса возьыны!

Редакцилэсь: «Азьлане» газетын Александра Кузьминична сярысь статья потӥз ни вал 2021-тӥ арын (№ 46, 26.11.2021 ар).

«Калыкысь потэм чуръёс...»
Вуы мыныса вутэк бертӥ, 
Кобые эбуись.
Огпол пуксьыса мон бӧрдӥ,
Кылкымесэ килемись.

Сьӧд нюлэслэн шораз будэм
Одӥг кизьпуэд — Лельвиж.
Гуртлэн шораз будэм
Одӥг шудтэм — ныл.

Сьӧд нюлэстэ потыкы,
Паллян пала кожем бере
Эй, туганъёсы ӟеч луэ
Мынэськым люкиськем бере.

Ву дюись вож бадьпу ке мон луысал,
Ву кисьтатэк будысал,
Шудо ныл ке луысал мон,
Анаен-атаен будысал.

Чиньыяд понэм азвесь зындэсэд,
Тямстон тямыс номеро,
Тямстон тямыс ар улӥ ке,
Уг вунэты тӥледыз.

Эн вунэтэ турынэз,
Эн вунэтэ сяськаез,
Уг вунэты мон тӥледыз,
Эн вунэтэ тӥ монэ.

Лыз-пурись валлэн пыдаз,
Бугор вань бугорез вандӥз.
Вань ум сюлмаське, ум бӧрдэме, 
Сюлмаськонэз буйгатӥсь Иньмар вань.

Эмезь бичаме потыса,
Чебер гужемме ортчытӥ.
Анай-атайлы вожъяськыса,
Даурме ортчытӥ.

Укно улам улмопу мертӥ
Куарезлэсь уно сяськаез.
Нылэз-пиез вордэм бере,
Ӟечезлэсь уно бӧрдонэз.

Нюлэс дурын папа кырӟа,
Кырӟамъяз пыдло пыре со.
Анайтэк-атайтэк будэм нылпи
Улэмъяз ӝоже усе.

Ми кулӥмы ке, дунне килёз,
Ми вылэ вож бадьпу ӝужалоз.
Со бадьпу вылын кикы силёз,
Милемыз налпасез бӧрдоз.

Кезьыт куазед, кезьыт гӧпэд
Шобырськон шуба кинь сётоз.
Анае ӧй ло, атае ӧй вал,
Кенеш сётӥсе но ӧй вал.

Чияк шултэ уӵы папа
Уйшор вуон вадескын.
Эн киль анайтэк, эн киль атайтэк,
Мугорысьтым ӝужан вадескын.

Кузь урам кузя мон ветлӥсько, 
Шильтыртӥсь емыш сийыса.
Шильтыртӥсь емыш дуно эбу,
Анаен атай туж дуно.

Милям мыноно сюресмы,
Кык палаз ик канало.
Ми ум кырӟалэ, кинь кырӟалоз,
Милям нуналмы лыдӟемын.

Кизьпу куар векчи ӝужа,
Векчи ӝужа, вож ӝужа
Куарлэсь вожзэ пужмер басьтоз,
Милеськым ӝожез кинь басьтоз.

Сьӧд нюлэс медам, гыль сяська медам,
Солэн шораз ву медам,
Аськомы медам, ум аське медам,
Оло вань аськем та медам.

Тэтэ сяськадэ бичатэк кили,
Али уз тӧлӟы шуыса,
Верано кылме вератэк кили
Али ум люкиське шуыса.

Ум люкиське шуыса,
Бур киме ӧй сёты.
Люкиськонмы арен ӧз лу
Часэн минутэн луиз.

Ӟеч лу но ӧз шуы,
Потыса кошкиз машинае.
Пуксьса монэ огнам кельтӥз,
Капка выжые гуньдытыса.

Пурак-пурак сӧсыпӱэд
Чырдэ уӵы папаед.
Чырдэ уӵы папаед но,
Бӧрдэ мынам сюлэмы.

Анае монэ эн кырӟа шуиз,
Кырӟад ке, бӧрдод шуиз.
Анайлӥсь верамзэ пелям ӧй поны,
Соин мон кырӟай ке, бӧрдӥсько.

Кыӵе тӧдьы сяська медам со,
Турлы кезьытлы со чида.
Кыӵе анай сюлэм медам со
Турлы кужмолы со чида.

Чагыр сяськаё кышетме
Кертэме потыса улӥсько.
Тӥ мусо туганъёсме
Адӟеме потыса улӥсько.

Сьӧд сюё гурезь пудэн
Сюрес гуждор уг ӝужа.
Пальмисько аслым ачым.
Пальмисько мылкыды тӥледыз яратэ.

Атае мынам виль минчо лэсьтэм,
Пырем медам анае?
Одӥг шудтэм ныл вордӥ шуыса,
Ӧкынэм медам анае?

Шудэ эбу, шудэ эбу,
Шудэ эбуись бӧрдӥсько,
Тушан шудо луиз ке гынэ,
Мед вордӥськоз ныл нуны. 

Чай пӧсьтӥд ке, сакыр кулэ,
Сур ке луысал, ярасал,
Нылэз-пиез вордэм бере,
Ӟеч кыл ке но, ярасал.

Озьы ке но уло шуисько вал,
Тазы ке но уло шуисько вал.
Нылэз пиез вордэм бере,
Кадырлы луо, дыр, шуисько вал.

Пукон вылады мон но пуксьысал,
Уксё куремдылэсь кышкасько.
Сётэм гинэ аракдэс дюысал но,
Визьмы ышемлэсь кышкасько.

Мынам туганъёсы мар каик,
Кесмег пыдэсысь му каик,
Туганъёс аркаин мон пукисько
Горшоке пуктэм гыль каик.

Анае монэ вордытозь,
Ворды вал пуныен коӵыштэ,
Коӵышед шырдэ кутысал,
Пуныед дордэ возьмасал.

Кыӵе писпулэн куарез медам
Шундылы пумить со пиштэ.
Кыӵе музъемын ветло медам,
Тыр толэзь кадь пиштыса.

Нюлэске мынӥ пу кораны, 
Корам пуэ туж токмо.
Ӵукна вырӟи ке, ӝытозь кырӟасько,
Мынам шудтэме туж токмо.

Кубыстаяды ву кисьталэ,
Кубыста ву яратэ.
Анайлы ӟеч кыл вералэ,
Анай ӟеч кылэз яратэ.

Зороно куазед мед зороз,
Валлэн пыд бер ышытозь,
Верась муртъёс мед вералозы,
Ӝужам шунды пуксьытозь.

Ой, туганъёсы, мусоосы,
Тӥ ваньды но мак сяська.
Мон гынэ огнам будӥськем,
Ӟег пушкись лыз сяська.

Сизьымо лампы люгыт ӝуа,
Пушказ вӧйыз луиз ке,
Монэ нылпиосы уз куштэ али,
Сюлмазы яратонзы луиз ке.

Озьы шуыса ӧй налпа,
Тазьы шуыса ӧй налпа,
Пинал дауры мак сяська вал,
Орчоз шуыса ӧй налпа.

Мак сяська тӧлӟыса кошке,
Киньлы кулэ модосэз?
Нылпиёс будо, потыса кошко,
Киньлы кулэ анай мурт?

Гожтэт гожтӥ тӥледлы,
Азь чиньые жадьытозь.
Уг вунэты тӥледыз,
Иньмар лулме басьтытозь.

Пушнер выжыяд ӝуйы,
Уз поты пушнерез нюлэс,
Уз шу аслам туганэ,
Аслым мусо со муртлы мусо уз поты.

Бадӟым сюреслэн тузоназ килиз
Лёгам пыд беры ортчыса.
Кошкиз, шӧдытэк кили
Пинял даурлӥсь орчемзэ.

Ойдо, мынӥм ке, мыныса бертом,
Гурезь бамад борылы.
Со борыез «дару» шуо,
Тылтэк ӝуась сюлэмлы.

Куазед ӝыт лӱэ
Шундыед пуксе — кышкасько дятлэн музъемаз,
Дятлэн музъемаз мон ыши ке,
Монэ утчасез кин луоз?
(Азьланьтонэз вань)