Сырьяысь кубызчи

Николай Плотников кубызэн сокем кема уг шуды ке но али, туннэ нуналэ мыло-кыдо пӧртэм концертъёсы, фестивальёсы кубызэныз пыриське ини. Кузьма Картамышевлэсь (Сырьяысь кубызчи, кулэмын ини) шудэмзэ адӟыса, та крезьгуро инструментлы синмаськем. Но кубызэн шудыны кутскемаз валтӥсь инты басьтӥллям Л. Д. Сапожниковлэн ӵектэмъёсыз. «Леонид Дмитриевичлэн котьку потэ вал, милям выступлениосамы кубыз гур мед чузъяськоз шуыса», — вера Николай Плотников. Озьы кутске Николайлэн кубызэн шудыны дышетскон дырез. Кубыз со доры Ижевскысь вуэм. Николай Плотников ватытэк вера, шудыны дышетскыны сокем секыт луымтэ, секыт луэм кубызлэсь сиоссэ настраивать карыны. «Яра али сиосты настраивать карыны юрттӥсь нимысьтыз приложение вань Интернетын.Та сярысь мыным Чудья Жени (Ижкарысь мультиинструменталист, пӧртэм инструментъёсын шудэ, соос пӧлын кубыз но — Н. Ж.) вераз. Николай Плотников, Михаил Романов кадь, кубызэн кема аръёс ӵоже уг шуды ке но али, ини пӧртэм удмурт кырӟанъёсты но зоутъёсты быдэстыны быгатэ. Соос пӧлын сюан гур, апай сямен эктон гур, чабата но мукетъёсыз. Ачиз шудыны дышетскем кубызчи-«самоучка» — Сырья гуртлэн данъяськонэз, гуртоосызлэн кубызчилы осконзы бадӟым.