Улон секытъёсты шумпотонэн воштӥз

Покчи Лӧзя гуртысь ужысь ветеран Мария Гурьяновна Изосимова 13-тӥ коньывуонэ пумитаз аслэсьтыз 90 аресъем юбилейзэ. Сӥлы карыса, юбилейзэ ортчытӥсь песянай доры куное вуиз Балтась ёрослэн кивалтэтэз. Лыктэм куноос Россилэн Президентэзлэн ӟечкылан открыткаеныз но Балтась ёрослэн главаезлэн Таукарон гожтэтэныз шумпоттӥзы. Таӵе сӥё-дано каремзы юбилярлэн сюлмаз шуныт пыртӥзы.

Мария Гурьяновна вордӥськиз Ӟаны гуртын 1933-тӥ арын. Пичи дырысен ик нылаш шуг-секытъёс пыр потоно луиз: атаез финн ожмаськонэ но пыриськиз, собере Быдӟым Атыкай оже кутсконысеныз ик кошкиз. Финн ожысь бертӥз ке, Быдӟым Атыкай ожысь бертон сюресэз копак ышиз. 

Пичи дырысен ик пиналъёслы ужен тодматсконо луиз, шулдыръяськонъёсты но палэнэ кельтоно луиз. «Бызем бере, Иван кузпалэн 2-3 пол киное мынӥм, соин вань шулдыръяськонъёсы ортчизы», — шуэ Марья Гурьяновна. Кузпалэз но туж вазь улонысь кошкем, 34 аресэн нылкышно 3 пиосыныз кылем. Нылпиоссэ будэтыны кузпалэзлэн семьяез юрттэм. 

«Улон сюрес капчи ӧй вал, троссэ адӟыны кылдӥз. Озьы ке но, туннэ нуналлы улонэ капчи, утялто, сюдо, вордо»

Секыт дыръёсты ортчытэм песянайлы, ужысь сӥё-дано ветеранлы, тыршись но шуныт сюлэмо нылкышнолы, яратӥсь анайлы но песянайлы сӥзиськом юн тазалык. Инмарен сётэм аръёссэ шудо ортчытыны мед кылдоз, котыраз матысь адямиосыныз, бускельёсыныз валаса, гажаса улыны. Котькуд нунал пальышась но шумпотон ымнырын пумитаны мед кылдоз!