«Ваньмыз семья кылдэм бере, нылпиос вордскем бере лыктэ – шудбур но, ваньбур но…»

2024-тӥ ар Россиын Семьялэн арезлы сӥземын. Та сярысь ваньмы тодӥськомы. Туннэ та котькудмы понна туж матын луись темаез азинтомы, Сырья гуртысь трос нылпиё Плотниковъёслэн семьяенызы тодматскыса.

Плотников фамилиез Балтась ёросын паськыт вӧлмем фамилиос пӧлы пыртӥд ке но луэ, дыр. Бадӟым Лӧзя гуртлэн 1-тӥ люкетаз Плотниковъёс быдэс урам люкаськозы шуыса вераны луоз, озьы ик Плотниковъёс вань Сырья гуртын но.

Озьыен, тодматске, кин уг тоды – семьялэн главаез Евгений, солэн кузпалэз Елена, нылъёссы – София, Полина но Арина.
Евгений Валерьевич ачиз но трос нылпиё семьяын будэмын. Лидия Егоровна но Валерий Ильич Плотниковъёс куинь нылпиослы улон кузьмазы, визьнод сётӥзы. Лариса, Пётр но Евгений – пичиысен ужаны дышетскыса, ӟеч сямъёсты пыӵатыса, ог-огзылы пыкет луыса быдэ вуизы, школаын умой дышетскизы, адӟем карымон луизы. Жаляса верано, Петязы гинэ шудтэм учыре шедьыса туж вазь югыт дуннеен люкиське (вылысьтыз секыт сюез мамык кадь небыт медло)...

Евгений вордске но будэ Сырья гуртын, гуртысьтызы ик покчиёзо школаын тодон-валан дуннее нырысетӥ вамышъёс но лэсьтэ, вордскем гуртаз ик ужез, ужлэсь берекетсэ дунъяны, ужась адямиез гажаны дышетске. Татын ик солы валан вуэ, макем трос тыршоно ӝӧк вылэ котькуд нунал буй-буй пыжем выль нянь но мукет ческыт сиён мед вуоз шуыса. Сое гурт удысын ужась адямиос гинэ рос-прос валало, луоз. Колхозын тыршон, тракторен ужан – ваньмыз та Евгений понна огшоры верам кылъёс гинэ ӧвӧл. Со зэмос гурт воргорон, ас гуртэзлэн патриотэз.

– Гуртысь кошкон сярысь малпанъёсы ноку но ӧй вал, – шуэ Евгений, – Мыным кельше огсыр гурт улон. Соин, 2002-тӥ арын Ципья шоръёзо школаын 11-тӥ классэз йылпумъяме бере, дышетсконме азьланьтыны малпай Киров улосвылысь Савали черкогуртысь техникумын, агрономлэсь ӧнерзэ басьтӥ. 2009-тӥ арысен колхозын ужасько ини, со пӧлысь ог 10 арзэ – тракторен.

Техникаен ужаны Евгений яратэ, аслаз хозяйствояз но солэн тракторез вань вылэм.

– Гурт но юртъер котыр ужъёсын – туж бадӟым юрттэт со, кулэ ке гуртоосылы но тракторен быдэстоно ужъёсын юрттӥсько, – шуэ воргорон.

Гуртооссы Евгениез ассэ но, семьязэ но туж гажало. Тани ма вера со сярысь Сырья гуртысь эшшо одӥгез адӟем карымон воргорон, удмурт азьветлӥсь Леонид Сапожников:

– Евгений Валерьевич – ас семьяезлэн осконэз, анаезлэн ӟеч пиез, апаезлэн – яратоно выныз, кузпалэзлэн – пал бурдыз, огезлэсь огез мусоесь визьпог куинь нылъёсызлы – ӟеч атай но, бадӟым дуннее сюрес лёгыны юрттӥсь самой матысь эшсы но.

Бускель калыкъёс удмуртъёсты ужась калык шуо ке, со ӵапак Евгений Валерьевич но солэн семьяез сярысь. Асьсэ кыжыменызы ужаса ваньбур пырто. Пӧсяса-нюласа ужамзылэн емышез – синмаськымон карыса лэсьтэм, выльдэм юртъерзы.

Дораз но, колхозын но сыӵе ик сюлмо ужа со. Гурт ужлэсь ноку но палэнскемез ӧвӧл. Колхоз техника буш ӧвӧл ке, аслэсьтыз «валзэ»-тракторзэ ужатэ, жаляса уг возьы. Гуртоосызлы но юрттэт кизэ мычыны котьку дась. Солэсь уд кылы тон «уг!» шуэмзэ. Али уг ке ваньмы тыныд юрттыны, дыр шедьтоз ужъёс бере ке но, нунал ортчыса ке но.

Евгений котьку но ӟеч, асьык мылкыдо, пальышась ымнырыныз бордаз кыске. Огпол пумиськид ке, нош но нош соин пумиськылыны ачид муг утчалод. Таӵе со Сырья гуртлэн данэз-шундыез!

Кузпалэз но Евгений Валерьевичлэн аслыз тупась. Елена Анатольевна – ӟеч сямо, каньыл мылкыдо, лякыт вераськись егит кышномурт. Ма, бен, нылпиосын ужась адями ӵапак сыӵе ик луыны кулэ. Угось Елена Плотникова нырысь визьнодась луыса ужаз, нош али дыре Сырья гуртысь покчиёзо школа-нылпи сад комплексэн кивалтэ.

– Мон вордӥськи Карек-Серма гуртын. Анае Ираида Семёновна, атае Анатолий Александрович. Кыкназы но колхозын ужазы. Анае Починкаысь фермаын парсьёсты сюдӥз, ферма борӟаськем бере песяймес утьыны кутскиз. Атае водитель вал. Жаляса верано, туннэ со пӧламы ӧвӧл ни…

Начальной тодон-валан асьме гуртысьтымы школаын басьтӥ, собере Ӟаны шоръёзо школае выжи. 9-тӥ классэз йылпумъяса, Арчаысь педагогикая колледже дышетскыны пыри. 2010-тӥ арын соейылпумъяй, – асэныз тодматӥз Елена Анатольевна.

Плотниковъёслэн семьяязы куинь муспотон нылъёс будо. Бадӟым нылзы София туэ 6-тӥ классэз йылпумъяз, шоретӥез Полина 4-тӥ классэ выжиз. Нылъёссы кыкназы но туж тыршисесь, умой дышетско. Покчиез нылзы – Арина. Солы 3 арес. Со нылпи садэ ветлэ.

– Елена Анатольевна, куке но малпады вал-а трос нылпиё анай луоды шуыса?

– Трос нылпиё анай луо шуыса ноку но ӧй малпа. Котьку малпасько вал, мынам кык пиналэ – ныл но пи – луоз шуыса. Но Инмарлы тау, мынам куинь муспотон нылъёсы будо.

– Нош кызьы тӥ тодматскиды, ку кутскиз яратондылэн историез, ку семья кылдытыны дась шуыса валады?

– Тодматскимы Яратӥсьёслэн нуналазы. Одӥг ар кадь пумиськылӥмы но собере семья кылдытыны малпамы. 2011-тӥ арын 15-тӥ толшоре сюанмы луиз.

– Выль статус басьтон, выль семьяе пырон – со, котьма ке но, дышем улон радлыке воштонъёс пыртон шуэм кыл. Кызьы ортчиз та этапты? Секыт вал-а дышыны выль семьялы?

– Кузпалэлэн семьяез монэ туж шуныт, умой пумитаз. Но, мазэ веранэз, нырысь-валысь секытгес вал: котьма ке но, котькуд семьялэн аслаз традициосыз, аслаз сям-йылолъёсыз, аслаз дунлыкъёсыз. Но собере дыши.

Вашкала дырысен удмуртъёс бадӟым семьяосын улыны дышемын. XX-тӥ даурлэн кутсконаз, кылсярысь, удмуртъёслэн бадӟым семьяязы ог 50 адями луыны быгатэ вылэм. 50 адямиен ӧвӧл ке но, удмурт гуртъёсын али но ӵемысь егит семьяос анай-атайёсынызы ӵош уло. Плотниковъёс но валче улоно кариськиллям, ог-огзылы юрттыса, ог-огзылы пыкет луыса.

– Анайзые Лидия Егоровна – туж умой кышномурт. 38 ар «Труд» колхозын бухгалтер луыса ужаз, али дыре пенсиын ини. Атайзые но, Валерий Ильич, трос аръёс ӵоже колхозын ужамын, жаляса верано, али дыре со милемын ӧвӧл ини (вылысьтыз сюез мамык кадь небыт мед луоз)... Лариса апаймы – Женялэн апаез – али дыре «Труд» колхозын бухгалтер луыса ужа.

– Анай луон нокинлы но капчиен уг сётӥськы, дыр. Нылпиос ведь трос кужымез, энергиез но саклыкез кулэ каро, ужъёс-сюлмаськонъёс йыло. Со вакытэ но семья бадӟым пыкет луэ.
– Нылпиосты визьноданын туж бадӟым юрттэт сётэ анайзые. Котькуд ласянь адӟем карымон кышномурт со милям. Мон ӵемысь ужын луисько. Нылъёс школаысь бертыку, песянайзы соосты котьку ческыт пӧсь сиёнэн пумита. Огъя вераса, мынам нылъёсы понна котьку сюлмы каньыл. Лариса апаймы но нылпиосмес визьноданэ быгатэмезъя аслэсьтыз люкетсэ пыртэ. Тау соослы туж бадӟым.

– Нылпиосты визьноданын кыӵе амалъёсты умоен лыдъяськоды?

– Жаляса верано, анай луыны уг дышето. Котькудӥз кышномурт ачиз аслаз тыршеменыз, аслаз янгышъёсыз яке арлыдо поколениослэн опытсы вылэ инъяськыса вутске со статусэ. Кызьы пӧрме, соиз ини мукет юан. Нылпиосты кышкатыса но алыса визьнодан – тужгес паськыт вӧлмем, но со дыре ик со тужгес пайдатэм визьнодан амал. – Мынам малпамея, нылпиосты визьноданын зарни шорзэ шедьтоно: ортчыт эркияно но ӧвол, мултэс чурыт но луоно ӧвӧл. Соосты яратоно гинэ. Нылпиос – со вылӥ данъет но бадӟым кылкутон. Соосты визьноданын тужгес валтӥсез – гажан но яратон!

Нош луэ-а котькудӥзлы огкадь тырмыт саклык висъяны? Уг кылдо-а соослэн вожвылъяськон мылкыдзы? Огъя вераса, кыӵе соос, тӥляд нылъёсты? Эшлыко-а?

– Мазэ веранэз, покчиезлы тросгес саклык висъяськод ни. Но ми тыршиськом котькудӥзлы дыр шедьтыны. Нылъёсмы эшлыко уло, вожвылъяськон мылкыдзы куспазы уг кылдо шуысал. Котькудӥзлэн аслаз сямыз, аслаз малпанъёсыз. Но ми соосты огзэсыз но ум висъяське, огкадь яратӥськом.

– Кызьы тӥ малпаськоды, кыӵе луыны кулэ идеальной семья?

– Мынам малпамея, идеальной семья – со куке кузпалъёс куспын шудо но тупаса улон вань.

– Нош кыӵе тӥ понна шудо семья?

– Семья шудо соку, куке семьяын ог-огдэ валан, ог-огдэ гажан но ог-огдэ яратон вань.

– Вань-а тӥляд асьтэлэн семья традициосты?

– Ми валче пумитаськомы Выль арез.

– Кызьы ӵемысь ортче тӥляд шутэтскон нуналды, куке тӥ ваньды дорады?

– Толалтэ куасэн нискыласьком, гужем кытчы ке инкуазе потаськом, пыласькыны ветлӥськом. Ваньмы ӵош юртъер котырысь ужъёсты быдэсъяськом.

– Трос нылпиен семья луон понна валтӥсь аргумент.

– Туала дыре тросэз малпало, нырысь карьера лэсьтоно, коньдон ужано, ваньбур люкано шуыса, собере гинэ, пе, семья, нылпиос сярысь малпаськоно. Мыным мукет сямен потэ, ваньмыз семья кылдэм бере, нылпиос вордскем бере лыктэ – шудбур но, ваньбур но. Малы ке шуоно тон соос понна, соос сярысь сюлмаськыса улыны кутскиськод ук. Самой валтӥсез анай-атай понна – нылпиосызлэн тазалыксы но шудзы.