Үзәк Чыршы бәйрәм рухы бүләк итте (+фоторепортаж)

Бүген "Балтач" ял паркында Яңа елның төп Чыршысын ачу тантанасы булды. Театральләштерелгән тамашада уен-көлкегә, җыр-биюгә урын күп бирелгән.

Чараны балтачлыларны һәм кайткан кунакларны Яңа ел белән котлап район башкарма комитеты җитәкчесенең урынбасары Илһам Гайнетдинов ачып җибәрде. Әлбәттә, бәйрәм күрке мәхәббәт Чыршы иде. Ул утларын кабызгач, чарага җыелган халык алкышлап, дәррәү кул чапты. Аеруча балалар куанды әлеге күңелле мизгелләргә. Кичке караңгылыкта районның төп чыршысы бигрәк тә матур күренде. Янәшәсендә кардан ясалган күп санлы сыннар урнашкан, чыршы янында ук мәһабәт Кыш бабай белән Кар кызы "сәламли". Алар белән беррәттән диярлек калайдан эшләнгән җәнлекләр дә күзгә рәхәтлек бирде.

Бәйрәм кәефе бөтен җирдә дә тоела иде. Һәркемнең төп игътибары сәхнәдә булды. Биредә беркемне дә битараф калдырмаган үзешчән артистлар үзләренең осталыкларын күрсәттеләр, олысы да, кечесе дә шаян җырлар астында биеде.