"ЙӘСИН" ТУТЫРУ

Урыс хәрефе, татар хәрефе, гарәп хәрефе, дигәнчегә кадәр, иң беренче, "Йәсин" тутыру, дигән сүзнең нәрсәне аңлатуын ачыкларга кирәк. Бу нәрсә шәригатьтә бармы? Аны бар дип әйтүчеләрнең дәлилләре нинди? Коръәндә Аллаһы Тәгалә: "Йәсин" тутырыгыз, дип әйттеме, әллә хәдистә Аллаһының Расүле шулай дидеме? Әгәр дә шундый дәлил булмаса, бу нәрсә шәригатьтә юк, дигән сүз. Икенчедән, әгәр дә инде кеше Коръән укый икән, әлбәттә, гарәп хәрефләре белән һәм дә тәҗвид кагыйдәләре буенча укыса, дөресрәк була. Әгәр дә кешенең, гарәп хәрефләре белән өйрәнергә мөмкинчелеге юк, тәҗвидне дә заманында үзләштерә алмаган, ә хәзер зиһене җитмичә, шул мөмкинлекне үзендә булдыра алмый икән, әлбәттә, бу кеше урыс хәрефләре белән булса да укып, Аллаһы Тәгалә каршындагы Вазыйфасын үтәргә мәҗбүр. Мисал өчен, намаз укыган вакытта шулай ятлаганнарны укыса була, чөнки башкача булдыра алмый. Ләкин инде намаздан тыш ниндидер фарыз булмаган нәрсәне үтим, дип хаталар кылып, үзеңә гөнаһ җыеп йөрү дөрес түгел.