Скал гидысен — Хорватие…

Туала дыре хозяйствоос, фермаос туала техникаен оборудовать каремен гинэ умой ужаны быгато шуыса верасьёс вань. Но, малпасько, лыдӟисьёс соглаш луозы: нокыӵе техника уз быгаты адямиез воштыны.

Фермалэн ужамез, солэн азинсконъёсыз, вормонъёсыз юн герӟасько ужась калыкен. Скал кыскисьёсты гинэ басьтомы. Туннэ нуналэ скал кыскисьёслэн, азьло дыръёсын ӵошатыса, ужзы капчигес луиз ке но, пудоосын ужась адямиослэн ужзы самой секыт ужъёс пӧлысь одӥгез луыса кыле. Но шумпотымон, асьмеос пӧлын но гурт удыслы, ужзылы сюлмысь сётскыса ужасьёс трос. Соос пӧлысь одӥгез — «Дуслык» обществоысь скал кыскись Анна Федотова.

Анна Сергеевна Федотова — «Дуслык» обществоысь азьмынӥсь скал кыскисьёслэн одӥгез. Солэн вормонъёсыз но вутсконъёсыз сярысь газет бамъёсамы кӧня ке пол гожъямы вал ини, таяз учыре Анна Сергеевнаен ужысьтыз азинсконъёсыз но Хорватие ветлэмез сярысь вераськимы.

— Анна Сергеевна, тӥ «Дуслык» обществоын туж кема уд ужаське, егит ужасьёс пӧлысь одӥгез луиськоды ке но, ужамдылэн бервылъёсыз ушъямонэсь ини.

— Туэ 1-тӥ апреле «Дуслыкын» ужаны кутскемелы 10 ар луиз ини. Со дырозь Карлыганын Пересьёслэн юртазы ужай. Собере Ӟаные улыны выжимы но, мон фермае ужаны интыяськи. Ватытэк верасько, нырысь «кытын ке но ужаны кулэ» шуыса гинэ ужаны кутскиськем вал. Озьы, куинь толэзь ӵоже кунян сюдӥсь луыса ужай. Собере ини мыным скалъёсты кыскыны группа сётӥзы. Тӥни со дырысен скал кыскись луыса ужасько.

— Пӧртэм конкурсъёсы пыриськыса, призо интыос басьтылӥськоды, Азьмынӥсьёслэн слётазы но луиды…

— Зэм. Азьмынӥсьёслэн слётазы 2015-тӥ арын мынӥ. Тросгес конкурсъёсы пыриськыны яратӥсько мон. Ёрос но республика масштабен ортчем пӧртэм ӧнер конкурсъёсын басьтэм призо интыосы но вань. Кылсярысь, туэ скалъёсты кысконъя операторъёс пӧлын 38-тӥзэ ортчытӥськись ёрос конкурсын 1-тӥ инты басьтӥ. Нялтас вераса, со ик конкурсын 2020-тӥ арын кыкетӥ инты басьтӥськем вал. 2015-тӥ арын но туэ ёрослэн главаез Рамиль Нутфуллин тыршыса но азинлыко ужаме понна Таукарон гожтэт сётӥз. Туэ ик Ципьяын ортчем Гырон быдтонын мыным Гырон быдтонлэсь флагзэ ӝутыны оскизы. 2018-тӥ арын пыриськи ӧнер устолыкъя «Лучший по профессии» республика масштабен агропромышленной комплексын ужась егитъёс пӧлын ортчись конкурсэ. «Лучший оператор машинного доения» номинацие пыриськыса, пыриськемме юнматӥсь дипломен пусйиськи. Нош со ик конкурсын, со ик номинациын 2019-тӥ арын 1-тӥ инты басьтӥ ини.

— Со конкурс сярысь пыр-почгес юалляськеме потэ. Тодэмея, конкурсын вормисьёсты Германие стажировкае лэзьыны кулэ вал.

— Вормемелы 10 сюрс манет сётӥзы но, мукет вормисьёсты кадь ик, Германие стажировкае лэзьыны кулэ вал. Конкурс 2019-тӥ арын вал ке, стажировкамы ортчыны кулэ вал 2020-тӥ арын. Жаляса вераны кулэ, пандемиен сэрен со стажировкае мыныны ӧм быгатэ. Но али кемалась ӧвӧл Хорватие мыныса бертӥмы.

— Германие мыныны быгатымтэды понна Хорватие лэзизы-а?

— Озьы. Кык арня ӵоже, 12-тӥ коньывуонысен 26-тӥ коньывуонозь, Хорватиын луимы. Республикаысь 24 ӵошен мынӥмы. Туж кельшиз милемлы отын. Нырысетӥзэ зарезез — Адриатической зарезез — отын адӟи. Вань Хорватиез — уйпалысен лымшорозь — адӟимы.

— Хорватиын асьтэлы трос кулэзэ, пайдаёзэ но тунсыкозэ шедьтӥллямды, дыр.

— Туж троссэ но выльзэ тодӥмы. Программамы нимаськиз «Аграрная Хорватия из первых уст» шуыса. Программалэн рамкаосаз ми тодматскимы Хорватилэн агропромышленной комплексэзлэн структураеныз, солэн ужан амалъёсыныз. Программалэн валтӥсь мугез гурт возёс удысын выль тодон-валан но опыт басьтон вал. Ми ветлӥмы Хорватиысь пӧртэм гурт возёс фермаосы но предприятиосы (картофкаез будэтонъя но утёнъя, каунлэсь вӧй поттонъя, зарезь сылал поттонъя предприятиосы; скал гидъёсы, вина лэсьтонъя, мандарин будэтонъя бусые, хамон но оливковой вӧйёсты поттонъя предприятиосы, мидиосты но зарезьын улӥсь сиыны ярамон куалялюльыосты (устрицаос) поттонъя фермае, сырпӧзьтонние). Гурт удысысь егит ужбергатӥсьёсын пумиськылӥмы, Выль Марофысь эко-фермае но «Лоньско поле» инкуазь парке вуимы, гурт возёсъя фестивале пыриськимы, гурт туризме пырись объектъёсы но ветлӥмы. Огъя вераса, ветлонмы туж пайдаё но тунсыко луиз. Али тани кемалась ӧвӧл Смаильын ортчем егитъёслэн форумазы но пыриськыса, Хорватиын ветлэме сярысь мади.

— Ветлондылэсь сыӵе шуныт гинэ мылкыдъёсты кылем бере, та выллем но мукет конкурсъёсы вуонояз но мыло-кыдо пыриськыны малпанъёсты вань, дыр.

— Конечно. Мон тазьы малпасько: ӵекто вылэм кыӵе ке конкурсъёсы пыриськыны, отказ сётоно ӧвӧл, пыриськоно. Астэ утёно, кышкано ӧвӧл, дӥсьтыны кулэ. Вылаз ик кивалтэт но тыныд оске ке. «Мон уг тодӥськы», «мон уг быгатӥськы» шуыса вераны капчи, дышетскыны но утьыны кулэ. Мон но, кылсярысь, конкурсъёсы дасяськыку, ачим интернетысь пӧртэм видеоосты учкыса дышетски, дасяськи.

— Ӵош ужасьёсты но юртто, куддыр кенеш но сёто-а?

— Сотэк уг луы. Романова Римма но Петрова Ольга скал кыскисьёслэн ужан опытсы туж бадӟым ини — 30 арлэсь тросгес. Соос шоры учкыса дышетскисько. Пудоен ужан понна, тодон-валан сяна, тросгес быгатонлык но опыт кулэ луэ. Тупаса но ог-огмылы юрттыса ужаськомы озьы ик Петрова Еленаен, Туктарова Натальяен, Шадрова Ираидаен. Фермаен кивалтӥсенымы (туннэ нуналэ Пор-Кутеш гуртысь мегафермаын тыршисько) Нина Терентьеваен но огъя кыл шедьтыса ужаськомы.

— Дорады но пудо вордӥськоды-а?

— Вордӥськомы. Ньыль скалмы вань, ветылмы, кунянъёсмы. Гуртын пудо вордытэк улыны уг луы. Кулэ карид ке, котьмалы дыр шедьтыны луэ. Дыры луыку, яратӥсько керттӥськыны, пыжиськыны — нылпиосме но шумпоттыны кулэ ук. Огъя вераса, котькуд кышномурт кадь, тыршисько ваньмаз вутскыны — ужын гинэ ӧвӧл, дорын но.

— Анна Сергеевна, «Дуслыкын» но, ёросын но тӥлесьтыд азинлыко ужамдэс умой тодо. Арлы быдэ умой показательёс возьматӥськоды, пӧртэм конкурсъёсы пыриськыны дӥсьтӥськоды, вормонъёсы но вутскиськоды. Со вормонъёсты тӥледлы азьпалан но бадӟым вормонъёсы вутскон понна стимул мед луозы!   

Анна Сергеевна Федотова (Казак) вордскемын 1986-тӥ арын Белоруссиын Витебск улосысь Рудное черкогуртын. Нылашлы куать арес луыкуз, семья бертэ анаезлэн вордскем гуртаз — Ӟаные. Анна гуртысьтыз школаез йылпумъяса, Казаньысь лицее дышетскыны пыре но почтовой связья операторлэсь ӧнерзэ басьтэ. 2014-тӥ арын Карлыганэ картлы кошке. Туннэ нуналэ Радион кузпалэныз (лэсьтӥськон ужъёсын выре) куинь нылпиоссэс будэто — Ульянаез, Сергеез но Аринаез. Уло Ӟаны гуртын.