«Сырья зоутъёс» межрегиональной фестивале пыриськизы

Та ужрадэ пыриськиз асьме районысьтымы «Сырья зоутъёс» ансамбльмы но. Сырьяос котьку туж активно пырисько район но республика масштабен ортчытэм конкурсъёсы, фестивальёсы, таяз учыре но соос палэнэ ӧз кыле.

Мыноно сюресмы кыдёкын вал ке но, вераськыса-вераськыса туж ӝог мыныса вуимы Починок Сутере. Макем шулдыр вылэм гуртсы, макем чебер клубзы но макем куно карыны быгатӥсь калыксы! Клублэсь ӧссэ усьтӥмы гинэ — отын милемыз витё ни вал удмурт дӥськутъёсын дӥсяськем нылкышноос но егит нылъёс. Мызганчи шудэ, нылъёс кырӟало, нылкышноос сиён-юонъёсты веръяны сёто. Ма, озьы пумитазы бере, кинлы но уз кельшы? Милемыз Кукморе нуэм водительёсмы гинэ но, асьсэос бигер ке но, шумпотыса концертэз учкизы, сырьяос сценае потыку «О, милямъёс пото» шуизы. Жаль, сырьяос асьсэос ӧз кылэ. Но моральной поддержка сотэк но трос вал — клубе люкаськем гурт калык ваньзэсты асьсэлэсь кадь, кужмо кичабонъёсын пумитаз, ӝутскем мылкыдын келяз.

Конкурсэ пыриськизы Кукмор ёросысь «Инвожо», «Ӟардон», «Яратон», «Вуюись», «Италмас», «Поющие сердца» ансамбльёс, озьы ик вал Вятской Полянаысь «Чипчирган» ансамбль но асьмелэн «Сырья зоутъёсмы». Сценае потытозь ик коллективъёс асьсэ куспын вераськизы — конкурентъёс кадь ӧвӧл, матысь эшъёс но бускельёс кадь. Соин ик та конкурс удмуртъёс понна бадӟым праздник луиз. Татын ваньзы анай кылынызы вераськизы. Кӧня ке час ӵоже сценаын удмурт кырӟанъёс гинэ жингыртӥзы, удмурт эктонъёс гинэ быдэстӥськизы. Жюри но шумпотыса учкиз вань кадь номеръёсты, телефонъёсазы видео но уськытъясьёс луизы соос пӧлын. Куное лыктэмъёслы, Вятской Полянаысь «Чипчирган» ансамбльлы но асьмелэн «Сырья зоутъёс» ансамбльмылы нимысьтыз бадӟым таукаронзэс вуттӥзы. Сапожников Леонид Дмитриевичез но туж ушъяса веразы. Удмурт лулчеберетэз, удмуртъёслэсь сям-йылолъёссэс утись, соосты егит поколенилы сётыны тыршись руководителез кызьы уд синйылты?

«Милемлы секыт вал туннэ судить карыны, малы ке шуоно ваньзы коллективъёс туж умой дасяськыса лыктӥллям, кудзэ бырйыны но уд тоды. Но ми жюри, соин ик ваньзэ лыдэ басьтоно — кызьы тӥ асьтэсыз сценаын возиды, кыӵе тӥляд костюмъёсты но трос мукетсэ... Удмурт эктон — туж тунсыко но аспӧртэмлыко, чебер но со дыре ик секыт эктон но. Со луэ туж задор но, луэ лиричной но. Соин но ваньдылы бадӟым тау вераме потэ, тӥ удмурт эктонэз пӧртэм ласянь возьматыны быгатӥды», — шуиз Кукмор ёросысь культура юртысь режиссёр Салахутдинов Рамиль Салихович, жюрилэн членэз.

Жюри нуналаз ик аслэсьтыз йылпумъянзэ лэсьтӥз — асьме «Сырья зоутъёсмы» 2-тӥ инты басьтӥзы. Коллективлы азьпалан но бадӟым вормонъёс сӥзисько. Молодцы!