Казан табибы Балтачта үткән кросста нишләгән?

Быелгы “Милләтләр кроссы” аеруча матур, күңелле узды. Чараның нәкъ менә Сабантуй мәйданында гаиләләр ярышы белән башлануы да бәйрәмгә үзгәлек өстәде. Саламбатыр ярышы да быелгы кросссның үзенчәлеге булды. Иң истә калган һәм дулкынландыргыч мизгел, мөгаен, Казанның 7 нче шәһәр хастаханәсенең ревматология үзәге җитәкчесе, югары дәрәҗәле табиб ревматолог, Татарстанның атказанган табибы Равия Мухинаның кросс тәмамлангач, үзе операция ясаган Балтач кызына махсус бүләк тапшыруы булгандыр. Аякларына ясалма имплант куйган кызның калганнар белән йөгерешкә баруы чарада катнашучы һәркемдә соклану хисләре уятты.