Балтачтагы матурлыкка кемнәр кул суза?

Җәй көне Балтачыбыз  чәчәкләргә күмелә. Шәхси йорт яннарына гына түгел, парклар, оешма-предприятие каршыларына,  кибет яннарына  төрледән-төрле чәчәкләр утыртып, тырыш райондашларыбыз матурлык тудыра.

«Алтын ай» кибетен генә алыйк,  бирегә килүчеләр дә,  яныннан узып китүчеләр дә мондагы матурлыкка сокланмый калмый. Яраннар тирә-якка матурлык биреп шау чәчәктә утыра. Ни кызганыч, шушы матурлыкка кул сузучылар да бар арабызда.

Яраннарның ботакларын өзеп, тар-мар итүчеләр арасында өлкәннәрнең булуы бер дә матур күренеш түгел. Юкса, кибет территориясендә камералар да бар. Кеше хезмәтен аяк астына салып таптау бит бу, җәмәгать.

Уйлап карагыз әле,  сезнең йорт территориясенә кереп, чит-ят кеше үзе кызыккан чәчәкне яисә гөлне шулай урлап алып китсә. Бу гамәл белән яшьләргә нинди үрнәк күрсәтәбез? Матурлык юктан гына барлыкка килми бит, аның артында тырыш хезмәт, финанс чыгымнары булуын барыбыз да яхшы аңлый. Башкалар хезмәтен юкка чыгармасак иде.