Менә шундый якташ – Таһир Галимҗан улы Һадиев

Шундыйларның берсе - авылдашыбыз, бүгенге көндә Татарстан Дәүләт Советы депутаты Таһир Галимҗан улы Һадиевның Чепья халкына күрсәткән игелекләрен санап кына бетерерлек түгел. Мәчет төзегәндә зур ярдәм күрсәткән Таһирыбыз ел саен Ислам дине кабул ителгән көнне Болгарга сәяхәт оештыра. Быел да, 20 май көнне, зур автобус яллап, мәчеткә йөрүчеләрне Болгарга алып барды. Җылы, йомшак автобуста юлның ераклыгын сизмәдек тә. Болгарда безне инде бик мөлаем экскурсовод көтеп тора иде. Музейларга, тарихи урыннарга экскурсия барыбызга да бик ошады. Барганнан кайтканга кадәр үзебездән бер тиен акча тотмадык, барысына да игелекле авылдашыбыз үзе түләде. Кырык кешене ике тапкыр ашатуны да оештырган иде ул.

Таһир Галимҗан улы әле өлкәннәрнең генә түгел, балаларның да күңелләрен күрә. Һәр җәйдә алар өчен Казанга күңелле сәяхәт оештыра. Менә шундый якташыбыз белән без, чепьялылар, ихластан горурланабыз һәм аңа алга таба да уңышлар, гаилә бәхете телибез.

Барлык авылдашлар исеменнән,
Раушания Шәйхиева.

PS. Шушы көннәрдә генә "Труд" хуҗалыгы мәчетебездә ифтар ашы үткәрде. Анда 90 кеше (шуның егермесе балалар) катнашты. Хуҗалык җитәкчесе Рәшит Һадиевка да бу изге гамәле өчен без бик рәхмәтле.

Фото: gossov.tatarstan.ru