Республиканың "Наз" хәйрия фонды Балтачның бертөркем баласына "Яңа ел тамашасы" бүләк итте.
Бүген "Наз" оешмасы җитәкчесе Нурания Сәйфетдинова патронажда торучы балалар өчен район социаль яклау бүлегендә "Чыршы бәйрәме" оештырды. Җәен дә балаларны туплап теплоходта сәяхәткә чыгалар яисә зоопаркка алып баралар. Кыскасы, балаларны күңелле ял иттерү өчен барысын да эшләргә тырышалар.
- Һәр бала гаиләдә үсәргә тиеш. Әти-әни назыннан беркем дә мәхрүм булырга тиеш түгел, - диде Нурания ханым.
Кыш Бабай белән Кар Кызы алар сораган бүләкләрне төяп килгән: йомшак уенчык, чаңгы, кәрәзле телефон, курчак, шахмат. Кәрим исемле малай түзмәде, шатлыгыннан телефонны үбеп, куанычыннан урынында ук тыпырдый башлады.
Бәйрәм чарасын Балтач урта мәктәбе волонтерлары тулыландырды. Алар балалар белән биеде, җырлады, күмәк җырлар белән чыршы тирәли әйләнде. Игелекле Нурания һәм Әсхәт Сәйфетдиновлар әниләрне дә онытмаган. Аларга бүлмә гөлләре бүләк иттеләр.
Нет комментариев