Танылган шәхесләр бүләк иткән авыл (+фоторепортаж)

Ак таулар астында качып утыручы әлеге авылда элек-электән җыр-моңга гашыйк кешеләр яши, бөтен татар дөньясына танылган Җәвәһирә Сәләхова, Римма Ибраһимовалар авылның йөзек кашы булып торалар. Римма ханым бүгенге көндә дә улы Фәрит, килене, танылган җырчы Ландыш Нигъмәтҗанова һәм оныклары белән авылга кайтып, ялларын шунда уздыра.

Кенә авылының үзенең «Сәйлән» ансамбле дә бар, төрле бәйрәм чараларында һәм конкурсларда чыгыш ясап, алар район күләмендә танылырга да өлгерде. Мәдәниятнең көчле булуын һәм баштагы клубның бик начар хәлгә килүен күреп, Кенәдә бик мәһабәт биналы мәдәният йорты салынды. Анда Кадрия Галимуллина җитәкчелек итә. Башка төр объектларны санап узсак, медпунктта озак еллардан бирле Рания Мотыйгуллина хезмәт куя. Ягымлы йөзе, һәрбер кешегә индивидуаль килеп эшли белүе өчен хөрмәт итә аны авыл халкы. Медпункт белән янәшә урнашкан почта бүлекчәсен бүгенге көндә Ләйсән Галиахмәтова җитәкли. Шулай ук янәшәдә генә ике кибет тә урнашкан. Халыкны көнкүреш кирәк-яраклары белән тәэмин итүгә күп көч куя алар.

Түбән Кенә авылында урнашкан мәктәпкә элек Хәсәншәех, Апаз якларыннан да килеп белем алганнар. Ләкин кайчандыр гөрләп торган мәктәп, балалар саны кимү нәтиҗәсендә, урта мәктәптән төп гомуми белем бирү мәктәбенә генә әйләнеп калды. Шулай да укытучылар кулларын кушырып утырмыйча, тырышып, барлык көчләрен куеп, Кенә мәктәбенә Советлар Союзы Герое Бакый Сибгатулла улы Рәхимов исеме бирдерүгә ирештеләр. Тырыш, балаларны ярата һәм үзләренекедәй күрә белгән коллективта бик хөрмәтле укытучылар эшли. Әлеге базага быел балалар бакчасы да кушылачак. Чөнки моңарчы сабыйлар йөргән бина искереп, тузган торакка әйләнде. Мәктәп белән бакча берләшү сәбәпле, бүгенге көндә белем бирү йортының эчендә дә, тышында да ремонт эшләре бара.

Авылның бүгенге көндә төп эше - печән әзерләү, чөнки әлеге җирлектә дә мал-туар саны байтак. Дәүләттән бирелгән ярдәмнәр хакында хәбәрдар булган халык барсыннан да файдаланып калырга ашыга. Моннан тыш кортчылык белән шөгыльләнүчеләр дә яши әлеге авылда. Районыбызның бренд балын җитештерүче Айдар Сәмигуллин Кенә авылында яши, ә кортчылыгы Кенәбаш авылы урманында урнашкан. Күптән түгел генә әлеге кәсеп белән шөгыльләнә башлагана Рафис Минһаҗев исә шулай ук табышлы керем дип саный үз эшен. Моңарчы аның умарталыгы суга якынрак җиргә урнаштырылган булса, киләчәктә плотина төзелүе күздә тотылып, хәзер кортлык әзрәк өскәрәк күчерелгән.