Адӟеммы ӧвӧл ке но, тодамы возиськомы

Васильева (Чочокова) Мария Васильевна – мынам ӵужанае. Вордске 1893 арын Сизнер гуртын, крестьян семьяын. Атаез, Чочоков Василий, туж данлы но узыр Чочок Осиплэн семьяысьтыз луэ.

Чочок Осиплэн луо вить пиосыз: Василий, Осип, Пётр, Стефан, Николай. Петырзы 25 ар эксэй армиын служить карем. Кыкетӥ пиезлэн, Василийлэн (ӵужанайлэн атаез), гуртын нимаз хозяйствоез луэм, соос уно пудо вордӥллям. Пудо кулэсь тук дукесъёс (тулуп) вуриллям. Тыршисесь, ужлэсь кышкасьтэмесь луиллям, бусы ужъёсын но выро вылэм. Та сярысь верало фактъёс но. 1931 арын Чочоков Василий Осиповичез, бадӟым музъемен кузёяськись карыса, кулаке потто.

Чочоков Василий кузпалэныз ньыль нылпи вордо. Нырысетӥ нылзы – Евдокия, быдэ вуыса бызе Китяк гуртэ Михейёслэн выжыязы (Михей Пашкалэн анаез луэ). Кыкетӥ нылзы – Мария, мынам ӵужанае. Куинетӥез – Елена, бызе Карек-Серма гуртэ, Сергей нимо пилы. Пичи Камас шуо, пе, вылэм кузпалзэ. Самой покчиез Михаил пизы (Сизнерысь Камас Семонлэн атаез), вордске 1910 арын. Будыса вуэм бераз, 1941 арын сое оже басьто. 1945 арын ожысь бертыса, гуртысь нылэн, Онсин Аннаен, семья кылдытэ. 1957 арын кузпалэз кулэм бере, корказы но ӝуа. Собере Михаил кошке Удмуртия пала, Можга каре интыяське. 1996 арын кулэ.

Мария нылзы (ӵужанае) тямыс аресэн мынэ школае дышетскыны. Ньыль арскын, дышетсконзэ йылпумъямез бере, Сизнерской грамотая курсэз ортчиз шуыса 705 номеро свидетельство басьтэ.

Нимысьтыз школа юрт луымтэ, дышетскиллям Колесников Пётрлэн (Габет Петыр) корказ, кудӥз нимаськем «Сизнерская школа грамоты». Одӥг этажаз кузёос асьсэос улӥллям, мукетаз дышетскиллям. Школа усьтӥськем 1899 арын. Нырысетӥ дышетӥсь луэм Герасимов Николай (Гарачин Микуай, 1878 арын вордскемын). Пиналъёсыз соку дышетӥллям церковно-славянской кылын но закон Божий книгая.

Мария дышетсконзэ быдтэм бере, Килятчи (Гурьевское) черкогуртын клиросын кырӟам. Ципья со дыре куиньлы люкиськем – Тлогурт, Килятчи но Чабья.

Ӵужанай будыса вуэмез бере, паръяське Сизнер гуртысь ик егит пиен. Солэн быръем муртыз луэ Александров Николай (Узы Микуай, 1897 арын вордскемын). Со но узыр но данлы семьяысь пияш луэм. Атаез – Бидаев Александр Сергеевич (Бидай Сергей, 1863 арын вордскем), узыр Самар выжыысь луэм. Марфа кузпалэнызы сизьым нылпи вордӥллям. Ньыль пиос но куинь нылъёс: Иван – 1884 арын вордскем, Евдокия – 1894 арын, Николай – 1897 арын, Параскева – 1890 арын, Максим – 1901 арын но Аграфена – 1905 арын. Нылпиоссы но тыршисесь, кибашлыесь, устоесь луиллям.

Ӵужатай кужмо, сӥльвиро но таза мугоро воргорон, чурыт но зэмлыко луэм. Ӝуждалаезъя но синмаськымон – зэмос удмурт батыр. Нокыӵе ужлэсь кышкасьтэм, быдэс уж солэн ки улаз берга вылэм. Асьсэлэн дуриськон куазы луэм, ачиз нош – усто дуриськись. Асьсэ хозяйствоязы вордӥллям туж трос пудо, ыжъёссэс кутьыен ик толалтэ куазен но Арбор шур дуре люктаны нуозы, пе, вал. Нимысьтыз ву юон интызы луэм.

Ӵужанаен ӵужатайлэн улон корказы туж бадӟым, куинь укноен ӝужыт но чебер луэм, лэсьтэмын 1927 арын (документъя). Юртъер котыразы бадӟымесь но ӝужытэсь лапасъёс луиллям. Одӥгез куро чумолё тырыны, собере толалтэ кутсан понна, мукетыз – ю тысь тырыны. Турын тыронзы нош нимаз. Соку сыӵе юртъёс котырын нокинлэн луымтэ.

Мария Васильевна туж умой тодэм бигер кылэз но. Бигерен вераськисьёс трос луиллямтэ азьло дыре, но бигер калыкен соос огкылысь улӥллям. Со, аслаз бадӟым пуховой шаленыз бинялскыса, ӵем ветлэм артысь бигер Тархан гуртэ. Огзы доры огзы куное ветлӥллям.

Мария, нырысетӥ нуныез вордскем бере но, черкын клиросын кырӟам на. Но Гаврилл нимо пизылы кема улыны кылдымтэ, кезьыт пыӵаса, куинь арес луэм меда, пичи пи кулэм. Пизэ ватэм бере, Инмар нош соослы укмыс ныл сётэ, пи нунызы уг луы ни. Нылъёсыз пӧлысь но куинез вазь куло, куатез гинэ улэ: Зинаида – 1922-тӥ арын вордске, Екатерина – 1926-тӥ арын, Матрёна – 1928-тӥ арын, Анастасия – 1930-тӥ арын, Ольга (мынам анае) – 1933-тӥ арын но Надежда – 1938-тӥ арын. Туннэ нуналэ Надязы гинэ улэп ни.

Ӵужанаен ӵужатай  нылпиосыныз ӵош огазе бусыын ужало, асьсэлэн нимаз хозяйствоязы. Тулыс ужаллям асьсэ семьяенызы ӵош, нош сӥзьыл октон-калтон вакытэ вань ӵыжы-выжыоссы но юрттӥллям. Ужаны кутскиллям вазь ӵукна ик султыса бер ӝытозь. Шунды потэмлэсь азьло но шунды пуксьытозь, шуозы вал пересьёс. Сиыны няньзы котьку но луэм ӝӧк вылазы, ёрмыса улӥллямтэ.

Гуртын советской власть кылдыку, колхоз огазеяськон вакытэ, Николайлэсь ваньзэ шуымон ваньбурзэ талаллям. Пудооссэс поттӥллям, валъёссэс басьтӥллям. Ужаны дасям арбериоссэс, быдэс ваньбурзэс хозяйствоысьтызы талаллям. Изэн лэсьтэм дуриськон куазэс гинэ но сэрттӥллям.

Ӵужатай колхозэ пырем туж бер, ваньбурзэс таласа быдтэмзы бере гинэ. Колхозын кузпалыныз ӵош ужаллям, пичи нылъёс но соослы юрттӥллям. Тужгес но етӥн октон дыръя пичиослы изён йӧтымтэ. Одӥг гектар етӥн бусыез ваньзэ киын ишкало, люкало вылэм. Котькуд хозяйстволэн фамилия интые аслаз пусэз вылэм. Милямъёслэн, кылсярысь, быжо кирос луэм. Ӵужатай колхозэ пырем бераз, колхозысь тракторъёсты, турнан машинаосты (жатка самоброска, сеялка, веялка) тупатъям.

Колхозын дуриськон куаын ужам. Отын валъёсыз тагаяло, амбар тунгонъёс, жильыос, ӟырыос вань кулэ арбериос лэсьтыло вылэм. Бусы ужъёс дыръя олома секта тӥрлыкен ящиксэ бусы кузя Максим выныныз пыдын кыскаса ветлӥллям. Черсиськон пулэсь колясаос но лэсьтыны вуылэм. Лэсьтэм салазкиос, тележкаос, уробо питыранъёс, туж трос юрт котырын кулэ луись арбериосты. Николаез котырын тодо но гажало вылэм. Солэн ӵемысь йыраз бергам ветлӥсь машина конструировать карон но аслэсьтыз лэсьтэм вузъёссэ данлы Чаддя базаре нуыса вузан малпан. Но улонын мар но уг луы, малпамтэ шорысь асьме шаере немец войскоос пыро. 1942 арын 24 январе ӵужатаез но оже басьто. Со арын ик гужем со бырыны шеде. Кулэмез сярысь кайгу ивор басьтэмез бере, ӵужанай йырсазьзэ ыштыса усе. Со туж кужмо висьыны кутске но валес вылысьтыз уг ни вырӟы. 1945 арын июнь толэзе, кема но секыт висемез бере, та дуннеысь кошке.

Самой бадӟым Зинаида нылзылы соку 23 арес луэ, но со картлы кошкыса вуэ гуртысь ик егит пилы Алпутин Емельянлы. Атай юртазы кузё луыса кыле кыкетӥ нылзы, 19 аресъем Екатерина. Со вакытэ Матрёна нылзылы 17, Анастасиялы 16, Ольга нылзылы 12 но самой покчи Надязылы 7 арес луэ. Кык пичи нылзэс сёто Смаиль гуртысь нылпи юртэ. Но соос отысь пегӟыса берто. Кенер вамен пичи Оли мырдэм кыскаса поттэ покчи сузэрзэ, отысен, ӟег бусытӥ пегӟыса, доразы бертыса вуо. Собере соосыз детдоме уг басьто ни, Олязэ кельто Катя апаез доры улыны, нош поки Надизэс Михаил дядяез вордыны басьтэ. Татын пичи ныллэн улэмез ачиз одӥг история, со нылпи юртэ кыльысал ке, оло, капчигес но луысал, дыр. Но адӟонэд вань ке, адӟытэк уд кылиськы шуэм веран юнме ӧвӧл вылэм.

Котькуд адямилэн аслаз улонэз, шумпотонэз, аслаз кайгуэз. Та нылъёслэн но жугиськон дыре улонзы капчи уг луы, котькудӥзлэсь улон сюрессэс нимаз гожтыны луэ.

Екатерина Николаевналэн верамезъя гожтӥз Анфиса Ермохина.

2005-тӥ ар.