Инмар вӧсь кылъёсмес мед кылоз! (1 люкет)

Оскон — адямилэн улоназ бадӟым инты басьтэ. Соин осконэз юнматӥсь интыосты вӧсян но православной калыклэн улоназ одӥгез валтӥсь югдур луэ. 

Ципья гурт вань йӧска-лыкъёсты огазеясь инты шуид ке, янгыш уз луы, дыр. Крашинэз но, порез но, удмуртэз но, ӟучез но, бигерез но огкадь мылкыдъёсын черклэн ӧсъёсаз пыре, сюлэмшугъяськонъёссэ кисьтэ. Сыӵе луыны кулэ вӧсь интыос, татчы адями лыктэ Инмарен матынгес луыны. Ваньмылы черк кыкетӥ лул шутэтскон инты луыны кулэ. Татын адями статусэзъя, ваньбурезъя уг люкиськы, котькуд адями Инмар азьын одӥг. Кыӵе гинэ узыр ваньбуро тон ӧвӧл, пумаз тон Инмар доры лулваньбуреныд гинэ вуиськод, со азьын кыл кутӥськод!

Ципья гуртысь Троицкой храмлэн историез но туж кыдёкысен кыстӥське ини, тае ваньзы тодо, луоз. Дыраз вань мылкыд карисьёс юрттӥзы интыез чылкытатыны, котырзэ радъяны, быдэс школаосын но татчы юрттӥськыны ветлӥзы. Кема аръёс ӵоже та храм но калык возьмаз аслэсьтыз вӧсьлыко нуналзэ. Та нунал вуиз — 4 гудырикошконэ Ципья черкогуртысь Троицкой храмез вӧсязы.

Пятидесятницалэн 6-тӥ Арняяз, равноапостольской Мария Магдалина мироносницаез буре ваён нуналэ, Ципья гуртын ӵукна ик ӝутскем мылкыдъёс бурдъяськизы ини. Инкуазь но, инбам но, котыр ваньмыз шумпотыса пумитаз та нимысьтыз чебер нуналэз. Шундылэн яркыт пиштэмез, тӧллэн шуныт пельтэмез, адямиослэн пальышась ымныръёссы — ваньмыз нуналлэсь кулэлыксэ пусйиз. Нош нунал зэмзэ но пайдаё вал. 

Казанской но Татарстанской митрополит Кириллэз быдэс ёросэн возьмазы, лэся. Сое пумитазы Балтась ёросысь исполнительной комитетлэн воштӥсез Ильгам Гайнутдинов, «Труд» возёслэн кивалтӥсез Рашид Хадиев, Ципья гурт поселенилэн главаез Азат Нотфуллин, «Калыкъёслэн эшъяськонзы» шаертодонъя музейлэн кивалтӥсез Сайдаш Нурмиев. Соос вакчияк тодматӥзы храмын лэсьтэм ужъёсын но митрополит Кириллэз выль храме келязы. Храме пырон азьын интыысь воскресной школае ветлӥсь нылпиос (дышетӥсьёссы — Алиса Филиппова, Таисия Ермолаева, Ирина Жукова), Владыкаез пумитаса, чебер кылбуръёс лыдӟизы, куноос соосты туж сак кылзӥзы. Котькудӥз нылпи Владыкалы тӧдьы роза кузьмаз. Таӵе пумитан лыктэм куноосты но синмаськытӥз, ужрад каньыл ортчоз шуыса, умой тодмет но луиз.

Собере вань лыктэм куноос но ёросысь Инмарлы оскисьёс храмлэн чылкыт юртаз пыризы. Тӧдьы борддоръёс юртэз эшшо но паськытато, чебер люстраос но электро амалэн ӝуась сюсьтылъёс синмез басьто. Храмлэн выж пулъёсаз лёгыкуд, валаськод: татын тынад лулыд шутэтскоз но одӥг арнялы кужым люкалоз. Озьы ик вань! Вӧсь кылъёс лыдӟыку, вылтыр ик юзыр-кезьыр луэ, кылъёс вире пыӵало. Нуналмысь шугъяськонъёс но ӧжытлы вуно кадь татын. 

Вӧсян ужрадэз нуыны Владыкалы юрттӥзы Татарстанской митрополилэн секретарез — иеромонах Кирилл (Корытко), Казаньысь Иоанно-Предтеченской пиосмурт монастырьлэн игуменэз Аркадий (Логинов), Ципьяысь Троицкой храмлэн настоятелез — протоиерей Сергий Нечипоренко, Репино гуртысь (Алатырской епархия) Воскресенской храмлэн настоятелез иеромонах Самуил Овчинников, Набережные Челныысь Инмар Анайлэн обросэзлы сӥзем «Неупиваемая Чаша» приходысьтыз настоятель — протоиерей Владимир Иванов, Большие Кабаны Преображенской храмлэн настоятелез — иеромонах Филипп (Киселёв), Покчи Лӧзяысь Инмар Анайлэн Казанской обросэзлэн храмезлэн настоятелез — иерей Рафаил Фёдоров. Огкылысь тыршемзы но ужамзы паймытӥз, со дыре ик синмаськытӥз но. 
Ёросысь трос гинэ адями люкаськиз праздничной ужрадэ. Татын арлыдоез но, туж пичиез но пумиськиз, быдэс семьяосты но адӟыны луиз. Туж шумпотымон, таӵе уж вакытэ но адями лулэзлы дыр висъяны быгатэ шуыса. Азьланяз но озьы ик медло вал!

Висъятэк кельтыны уг луы хорез но. Сыӵе чебер, сюлме пыӵась куараос котькуд адямилэн пушказ кылё. Вӧсь кырӟанъёс котьку сюлме аспӧртэмлыко мылкыд кельто, пушкад маке югытгес луэ, шуныт пыре, секыт малпанъёс но тӧлзо. Богослужебной кырӟанъёсты Марина Литвиненколэн кивалтэмез улсын архиерейской суро хор быдэстӥз.

Вӧсян чин йылпумъяськем бере митрополит Кирилл Инмарлы оскисьёслы таӵе кылъёсын вазиськиз:

— Туннэ храмлэн улӟытонэз но выльдӥськонэз. Кин ке малпаз, дыр, храм кулӥз шуыса, ведь асьме пӧлын вань сыӵеос, кудъёсыз тодазы возё храмлэсь куашкам дырзэ. Но туннэ со выльысь улӟиз. Со улӟиз асьме Инбамлэн, Инмарлэн, Пресвятой Богородицалэн, вӧсьлыко Инмар угодникъёслэн, Ӟуч Черклэн новомученикъёсызлэн но исповедникъёсызлэн яратэмзы но утемзы улсын. Соос Инмар азьын асьсэ вордскем музъемзы понна сыло но юн вӧсясько. Храм улӟиз служение быдэстӥсьёслэн тыршеменызы. Туннэ Инмарлы нимысьтыз таукарон нунал. 

Туннэ ик равноапостольной Мария Магдалинаез буре ваён нунал. Со нырысетӥез, кин Инмарлэн Улӟемез сярысь ивортӥз. «Христос Воскресе!» — быдэс шаерамы пӧртэм кылын чузъяське. 

Та кылъёс туж шонер возьмато ужрадлэсь кулэлыксэ но калыклы ваем шумпотонзэ. Акашка — православной осконэн улӥсьёс понна тужгес сӥлы карымон нунал. Та вакытэ вань калык чылкытатске но выль осконъёсын тырме.

Инмарлы вӧсяськон ужрад бере митрополит Кирилл Инмарлы оскисьёсты но праздникен ӟечкылаз: 
— Туж шумпотӥсько та ӟучарняез тӥледын ортчытыны. Ӟучарняез котьку Инмарлы сӥзьыны кулэ, туннэ тӥ та веранэз зэматӥды. Тӥ юн вӧсяськиды, тросэз йӧскалык дӥськутэн лыктӥзы, вӧськылъёс пӧртэм кылъёсын чузъяськизы. Но Инмармы асьмелэн одӥг. Со ваньзэс кылэ, котькинлы саклык висъя, вӧсьмес кутэ. Инмар мед сётоз тӥледлы тазалык, юрттэт, буйгатон но шумпотон! Инмар тӥледыз мед утёз!