«Котькуд пиосмурт атай луэм бераз гинэ улонлэсь пуштроссэ валаны кутске, дыр»

Котькуд адямилэн улоназ кык пар бурдъёсыз вань — Анай но Атай. Соос быдэс улон кузя тонэ нуо, дышето но юн ярато. Соослэн пыкет луэмзы ватсам стимул сётэ азьлань мыныны но трос ужъёсты лэсьтыны.

Асьмеос Анайлэсь праздниксэ тодӥськом но, пусйиськом но. Нош атайёс котьку сямен палэнэгес кылё вал. Соослы нимысьтыз Атыкай музъем утись праздник гинэ висъяськылӥз. Нош табере Атайёс но асьсэлэсь нуналзэ пусйыны быгато ини, малы ке шуоно коньывуонлэн куинетӥ ӟучарняяз асьме шаерамы Атайёслэн нуналзы пусйиське. Таяз аре та праздник 15 коньывуонлы тупа. Асьме шаермы понна та туж «егит» праздник на, историез 2021 арысен кутске. 

Атай... Кӧня та кылын кужым, юн мылкыд, дӥсьтон, кылкутон но матысьёссы понна сюлмаськон. Атайлэн мышказ тӧл но небыт пельтэ, зор но уг йӧты, лымы но каллен шуныт луыса усе. Пиос понна нимысьтыз кулэ луись адями, со — эш, визьнодась, улонлы, зэмос пиосмурт сямлы дышетӥсь. Солэн кияз огшоры пу но улӟе, секыт уж но капчиёме. 

Пиосмурт быдэс улоназ зэмос атай луон сюресын сылэ. Пичи дырысеныз песятаезлэсь, атаезлэсь быгатонлыкъёссэ асэстыса, пӧртэм пиосмурт ужъёслы дышыса, лэсьтэм ужъёсызлы кылкутӥсь луыса, пияш бадӟым улонын аслыз инты утча, сюрессэ лёге.

Пилэн улоназ атайлэн интыез

Атайлэн примерез — пилы улонын огпӧртэм знамя луэ. Пилэн астэ ачид пиосмурт кадь возён сямыз кылдэ. Аслаз авторитетэныз атай возьматэ, кытчы кыстӥськоно, сюресаз кыӵе шуг-секытъёсын пумиськоно луоз. Пизэ будэтыкуз, пиосмуртлы одно ик ассэ ачиз воземезлы но сямъёсызлы саклык висъяны кулэ. Янгыш лэсьтӥд ке, нылпи соку ик сое ас вылаз басьтоз ук! 

Ӟеч но быдэс семьяын будэм пияш ас бадӟым улоназ но сыӵе ик инъетъёсъя улэ. Анай-атай кусыпъёсын егитъёслэн азьпалан ог-огенызы кусыпъёссы но герӟасько. 
Тросэз егит пиос мугорзэс кыдато, кужмо но чидась карыны тыршо. Атай ик юрттэ солы тупась спорт бырйыны, татын со физической кужымзэ сяна, ассэ возьыны но дисциплиналы дыше. Атаеныз валче нылпи вань шуг-секытъёсты ортче. Соин валче пиосмурт пизэ ушъяны, удалтымтэосаз юн пыкет луыны но юрттыны кулэ.

Ныллэн улоназ атайлэн интыез 

Нош нылъёс воксё аспӧртэмлыко адӟо атайзылэсь визьнодамзэс. Соослэн валаназы пиосмуртлэн образэз улонзы ӵоже возиське. Атай пичи дырысеныз ик нылэзлы яратонзэ, шунытсэ, небытсэ сётӥз ке, нылаш улоназ кузпал но атаезлы кельшисьсэ утчалоз. 

Ӵемысь асьмеос адӟыны быгатӥськом: атай ваньзэ лэсьтыны дась пичи «принцессаез» понна. Котькуд куронзэ лэсьтэ, мултэс нуныя. Одӥг паласен, со туж умой, мукет паласен — янгыш, дыр. Малы ке шуоно мултэс эркиям нылаш будыса ваменэс, вылтӥяськись луыны быгатоз. Бадӟым улонын солы кузпал шедьтыны но туж шуг луоз.

Нылмуртлы анай-атай кусыпъёсты адӟыны кулэ. Со суред пичи дырысеныз ик семья дунъетъёсты но пиосын кусыпъёс кылдытон пуктэ. Атайлэн валтӥсь ужез — нылэз улон интыезлы дышетыны, котырысь улосэн тодматыны. Озьы ик котькуд инкуазен герӟаськем юанъёсын но юрттэт сётыны быгатыны кулэ.

Нош кызьы нылаш понна но, пияш понна но «идеальной» атай луоно? Кызьы котькуд нылпилы нимысьтыз дыр висъяны быгатоно? Та юанъёслы валэктонъёс утчаны тыршим Тагашур гуртын улӥсь трос нылпиё атаен Алексей Копаровен ӵош.
Туннэ нуналлы солэсь улонзэ шулдырто 3 нылпиосыз: Лиана (2009) Ципья шоръёзо школаын 8 классын дышетске, Арсений (2015) Ципья шоръёзо школаын 2 классын дышетске но муспотон пичи Игнат (2022).

— Алексей Александрович, азьло ик вералэ вал асьтэлэн пинал дырды, семьяды сярысь.

— Вордӥськи мон Ципья гуртын 1981 арын. Семьяямы кык кузя пиос будӥмы. Котькуд пияш пичи дырысеныз атай бордыгес кыстӥське, ми но озьы ик вал. Атаймы, Александр Иванович, ужлы дышетыны тыршиз. (Жаляса верано, туннэ нуналэ асьме пӧлын ӧвӧл ни со). Тросгес песятаен дырмес ортчытӥм ни. Али туж каньыл улӥськом, нылпиос пу коран, эгыр пыртон, ву нуллон ужъёсты уг ни тодо. Ми школаысь бертэм бере ужаны кутскиськом вал ини, собере урокъёсты дасяны пуксиськом вал. Кытын ке юрттыны косо вал, кытын ке асьмеос ужез синйылтӥм. Котькуд гуртысь пиналлэн кадь ик улон мынӥз. Дышетски Ципья гуртысь шоръёзо школаын. Дышетсконын пӧртэмез луылӥз, нимысьтыз висъямон дыръёс ӧй вал. 

— Ужан сюресты кытысен кутскиз?

— 7 ар ӵоже слесарь луыса ветлӥ. Собере Казане кошки, 5 ар куспын шиномонтажын ужаны вутски. Собере вордскем палъёсы бертоно кариськи, Ципья гуртысь шиномонтажын 6 ар ӵоже ужай. Табере ини 6-тӥ арзэ нюлэсчи луыса тыршисько.

— Ужан ужды кельше-а? 

— Кельше-а, уг кельшы-а, кытын ке адями ужаны кулэ ук. Сӥзьыл но тулыс ужъёс туж трос: мерттӥськон дыр. Ӵукна кошкиськод, бер ӝыт бертӥськод. Куддыр семьяез но адӟыны дыр ӧвӧл. Балтась ёрос сяна, Арча ёрос но уж удысамы пыре, соин мерттӥськон интыос тырмыт. Мукет дыръёсы но ужъёс трос: мерттэм удъёсты, писпуосты утёно, интыосты чылкытатоно. Тани куартолэзе выль корка лэсьтыны кутским, шутэтскыны куриськи, лэземзы уг поты вал. Ӧд ке лэзе, ачим кошкисько шуисько вал ини, кылзӥзы — шутэтскон сётӥзы. Котькуд ужын сюлмысь тыршид ке, ужед но кельше, астэ но гажаны кутско. 

Та веранэн туж соглаш луисько. Адями котькуд ужын ассэ ӟеч сямо гинэ возьматыны кулэ. Алексей Александровичлэсь тыршемзэ, ужась луэмзэ гуртоосыз но пусъё. Ваньзэ, пе, дыраз лэсьтыны тырше, котькинлы юрттӥське, ассэ вылӥе уг пукты.

— Атай «сюресты» ку кутскиз?

— 2009 арын Лиана нылмы вордӥськиз. Соку мыным 28 арес вал. Агайлэн семьяяз 5 пиос будо бере, ныл возьмазы ини. «Одно ик ныл луоз», — шуизы ӵыжы-выжыосмы. Нимаз ик песянаез ныл возьмаз. Озьы ик луиз... Мынам нылы пичи дырысеныз ик мон борды кыстӥське. Мерттӥськонъёсы но ӵошен ветлӥськом куддыр. «Атай ныл» со трослы. 

Ачиз но Лиана ассэ «атай ныл» шуэ. Анаез но, Марина Александровна, таин соглаш. Атаез сярысь юаку, нылаш шуныт мылкыдъёсын гинэ вазиське. «Атаймы ӟеч, кулэ дыръя чурыт куронъёс но пуктэ, туж тыршись. Мон но котькуд ужаз юрттыны тыршисько, ужзэ капчиятыны. Золгес куараен вазиз ке, чурыт мылкыдъёсын уг учкиськы, ваньзэ валасько», — шарая малпанъёссэ Лиана.
«Ымдуръёссэ пепертыса гинэ шорам учкыса ветлоз кӧня ке дыр», — пальпотыса ватса атаез.

Нош Арсений пиез туж юн, зӥбыт пияш. Школа сяна, нюръяськонэн тунсыкъяське. Зэмос пияш сямен соку ик атаез борды интыяське. Атай — со утись ук. Нылпиос соин ик кышкыттэм инты утчало, бадӟымъёслэсь зэмос малпанъёссэс шӧдо но адӟо. «Тренерезлэсь туннэ юалляськи ай, кыӵегес пилэн азинсконъёсыз шуыса. Тырше шуэ, быгатонлыкъёсыз будо. Мон шумпотӥсько гинэ», — вера Алексей Александрович. 
Покчи пизы — Игнат, быдэс вераськонмес атаез дорын пукиз. Огазе шудыны но вутскизы. Оглом вераса, пичи нунок атаезлэсь яратэмзэ шӧдэ. Малпасько, азьланяз но сыӵе ик юн кусыпъёссы возиськозы.

— Малпасько, атай луонын пӧртэмез луэ: секытэз но, капчиез но. Тӥ кытысь кужым шедьтӥськоды нылпиосыныды огкылысь тупаса улыны?

— Пӧртэм дыръёс но луо. Куддыр золгес но вазёно, куддыр эркияса но басьтоно. Пичи дыръязы нуныяськод ини, ваньзэ басьтӥськод, будэмъязы чурыт кутыны кутскиськод. Идеальной атай луыны нокин уг быгаты, котькинлэн янгышез луэ, дыр. Адями улоназ но янгыштэк улыны уг быгаты, янгышъёс вылын ик дышетскиськод. Котькуд атайлэн аслаз визьнодан амалъёсыз вань, дыр.

— Егит атайёслы кыӵе визь-кенеш сётыны быгатысалды? 

— Кыӵе кенеш сётод ни татын? Мон нылпи вордон удысын ачим но троссэ уг тодӥськы, дыр, ай. Асьсэос атай луизы ке, валалозы. Атай луон мылкыдъёс нылпи будонъя гинэ ӧраз пыро.

— Зэмос атайлэн кужымез ма бордын?

— Нылпиезлэн улон шоры кышкатэк учкемез бордын. 
Яратоно семья пиосмурт понна зэмос пыкет луэ, нош нылкышно — семьяын шуныт кусыпъёсты утись, нылпиосты будэтӥсь но пиосмуртлы кужым сётӥсь. Алексейлы но та ласянь юрттэ кышноез — Марина Александровна Копарова. Со вордӥськиз Тагашур гуртын ик. 

— Тросэз шуо, нылмурт атаез шоры учкыса аслыз улонын кузпал шедьтэ шуыса, соглаш-а тӥ та веранэн?

— Зэм но, дыр. Ми кузпалэным гурт клубын тодматским, 2010 арын гожтӥським. Улонмы каньыл, шудо. Кузпалъёслэн улоназы котькыӵе дыръёссы луо ке но, соосты валче валаса, тупаса ортчыны кулэ. Нылпиосмы атайзылэсь бертэмзэ сюлмысь возьмало. Жадьыса бертӥз ке но, нылпиосын шудыны, юрттыны, соосын дырзэ ортчытыны тырше. Нылпиос со борды туж герӟаськемын, сюлмысь ярато, примере пукто.

Копаровъёслэн семьязы зэмзэ ик туж шудо. Нылпиоссы ӟеч сямо, шуныт кылъёсын гинэ вазисько, пумит уг вазё. Семьялэн валтӥсь тодметъёсыз — кузпалъёслэн ог-огенызы кусыпъёссы но семья понна тыршемзы. Алексей но Марина Копаровъёс та ласянь туж тыршись кузпалъёс.

Туэ гуртазы ик выль, 2 этажъем корка пуктыны кутскизы. Та ласянь семьялы элькунамы вӧлмем программа юрттэ. Выль корказы туж бадӟым. Трос нылпиё семьялы азьланяз туж умой луоз отын.

Копаровъёслэн семьязылы азьланяз но ог-огзэс яратыса, гажаса улыны сӥзиськом. Алексей Александровичлы тазалык, ужаз азинсконъёс, нылпиоссэ будэтыны кужым. Нылпиостылэн нылпиоссы но тӥ шоры яратӥсь, гажась синъёсын гинэ мед учкозы. Кыӵе сюлмысь, яратӥсь атай, сыӵе ик песятай-ӵужатай луыны но мед кылдоз! 

Учырен пайдаяськыса вань атайёсты праздник нуналэнызы ӟечкыласьком! Улонады котьку шундыё нуналъёс гинэ мед луозы, семьяяды яратон мед пушъёз, нош нылпиосты вормонъёсынызы, азинсконъёсынызы гинэ мед шумпоттозы! Тӥ — нылпиостылэн зэмос пыкетсы, зэмос кунмуртъёсты дасясьёс! Ӟеч ужъёсты шоры учкыса, нылпиостылэн йыразы шонер индылонъёс гинэ мед пырозы. Ӟырдыт сюлмын, сазь йырын атай ужлы сётӥськыса, нылпиостылэсь умойзэ гинэ адӟыны мед кылдоз! Улонды кема аръёс ӵоже мед кыстӥськоз на, нош вӧзады котьку матысь но яратӥсь адямиос мед луозы!