Роман Никитин: «Улонме одно ик спортэн герӟаме потӥз, малы ке шуоно спорт — мон понна со улон»

Та верам кылъёсыз, малпасько, дышетӥсь сярысь гинэ верамын ӧвӧл. Со визьнодасьёслы но, тренеръёслы но — огъя вераса, нылпиосын герӟаськем ужасьёслы тупа.

Сыӵе зэмос тренер, кудӥз ужезлы вань сюлэмзэ сётыса ужа, луэ Ципьяысь Никитин Роман Валентинович но. Со нылпиосты куасэн ветлыны дышетэ.

Пумиськимы Роман Валентиновичен ӝытпал школалэн спортивной площадкаяз. Со дыре отын школьникъёс но студентъёс футбол шудо вал, кудӥз-огез сигарет кыскыса сылэ. Роман Валентинович лыктыса гинэ вуиз, ини школьникъёсты тышкаськыса вераны но кутскиз: «Тани нош сыло ни сигаретъёссэс кыскыса. Ма мар кароно ни таосын». Ас поннам малпасько: «Валамон, та таза улон сямъя улӥсь пиосмурт». Ма, зэмос тренер. Сыӵеосты ваньзы гажало. Ӟечъяськыса но кӧня ке улонмы но ужъёсмы  сярысь вераськеммы бере, тренерской ужез сярысь но вераськыны кутскимы.

— Роман Валентинович, тӥ тренер луыса ӧжыт уд ужаське ни. Нылпиосты яратӥськоды, соос но тӥледыз гажало. Тренерской уж борды малы басьтӥськоно кариды? Дышетскемдыя тренер луиськоды-а?

— Зэмзэ ке верано, нырысь ик мон дышетскемын Урнякын сварщиклы, собере Можгаын ватсаса тодон-валан сётонъя физкультурая дышетӥсьлы дышетски. Можгаын тани соиз умой вал — отын куасэн герӟаськем спортлы бадӟым саклык висъяське. Тазэ дышетскон юртэз йылпумъям бере, Ципья школае куасэн бызьылонъя тренер-преподаватель луыса ужаны интыяськи. Со вал 2009-тӥ ар. Али заочно Казаньын организацилэн менеджерезлы но дышетски КИФИИ-ын. Но улонме одно ик спортэн герӟаме потӥз, малы ке шуоно спорт — мон понна со улон. Школаын дышетскыкум ик куасэн бызьылыны яратӥсько вал, хоккеен но шудыса курадӟи.

— Спорт тӥ понна кыӵе ке луонлыкъёс сётэ-а? Валамон, спортэн вырон тазалыкез юнматэ, чиданлык сётэ. Со сяна нош кыӵе солэн пайдаез вань?

— Спортсменъёс ӵемысь пӧртэм ӵошатсконъёсы ветло. Озьыен, спорт соос понна, ма ми понна, тренеръёслы но, шаермес учкыны луонлык сётэ. Но номыр но капчиен уг сётӥськы. Валаны кулэ, самой трос тыршисьёслы, асьсэды возьматыны быгатӥсьёслы гинэ таӵе луонлыкъёс кылдо шуыса. Трос проблемаос туала дыре. Тани, шуом, нылпиосты бадӟым ӵошатсконъёсы дасян понна котьку условиос но уг луо, инвентарь но уг тырмы... Но озьы ке но, нылпиосмылэн тыршемзы юнме уг ортчы. Кылсярысь, туэ гинэ но асьмелэнъёс куасэн бызьылонъя Всероссийской ӵошатсконъёсы пыриськизы.

— Нош тӥ нылпиосыныды тренировкаос луымтэ дыръя кусып возиськоды-а? Тунсыкъяськиськоды-а соослэн улонэнызы, дышетсконэнызы?

— Конечно. Сотэк уг луы. Ваньзэсын дышетскисьёсыным юн кусып возьыны тыршисько. Кин монэным кутсконысеныз пумозяз, соослы тужгес но юрттыны тыршисько. Нимаз нокинэ висъяса вераме уг поты, малы ке шуоно ваньзы нылпиосы тыршисесь. Но куд-огезлы ачим я кытчы ке дышетскыны пырыны ӵектӥсько, я кыӵе ке кенешъёс сётӥсько. Спорт но тренировка сярысь гинэ котьку вераськыны уг луы нылпиосын.

— Тренировкаос сярысь нимаз вераськомы ай. Кытын соос ортчо? Инкуазь условиос шоры учкыса кыӵе ке план пуктӥськоды-а, оло, нылпиослэн куремзыя тренировкаосты радъяськоды?

— Тренировкаосмес нылпиослы мӧзмыт медаз луы шуыса пӧртэм сямен радъяны тыршисько. Инкуазен но тросэз герӟаське. Кылсярысь, лыжной сезон дыръя урамын куасэн ветлӥськомы, нош со сезон йылпумъяське ке, спортзалын заниматься кариськом. Гужем урамын роллерен ветлӥськомы, нюлэскын бызьылӥськомы. Ӵем дыръя нылпиосын шудон амалъёсты кутӥсько — соослы со туж кельше. Котьку нылпиослэн куремзыя ваньзэ уг кариськы, соос сямен гинэ карид ке, чырты вылэ пуксёзы (серекъя). Спорт — со спорт. Поблажкаос карисько ке но, шер гинэ.

— Нылпиосты люкаку, луэ-а соку ик валаны, кинлэн вань быгатонлыкъёсыз, нош кинлэн — ӧвӧл? Быгатонлыкъёссы шоры учкытэк ваньзэсты басьтыны яра-а?

— Мон тыршисько ваньзэсты басьтыны, кинлэн аслаз мылкыдыз вань. Нылпиосты кызьы бен люкод? Пичиослы ведь одӥг пӧртэм куронъёс, бадӟымъёслы — мукетгес. Соин но котькин быгатэ ветлыны. Ма, зэмзэ верад ке, выбор туж бадӟым ӧвӧл, кинэ басьтом, кинэ уг — малпанэз но ӧвӧл. Али трос нылпи люкаськиз ке но ведь соос одӥген-кыкен спортлэсь куштӥськыны но быгато. Но валаны луэ, кинлэн ваньмыз умой пӧрме, нош кинлэн — уг. Татын ини котькуд нылпиен нимаз выроно, нимысьтыз подход котькудӥзлы шедьтоно.

— Туала дыре модае пыриз спортэн вырыны но шонер сиськыны. Та туж умой, шуыны кулэ. Но ӵемысь нылпиослэн школаын дышетскон вакытазы, яке студент луыкузы ваньзэ утемзы потэ — сигарет кыскемзы, кудӟытӥсь юонъёсты юэмзы. Собере ини та умойтэм дышем сямзылэсь куштӥськыны уг быгато. Кызьы тӥ малпаськоды, луэ-а школьникъёсын та ласянь кыӵе ке ужъёс нуыны, спорт соослы юрттэ-а урод сямъёссылэсь куштӥськыны?

— Мон собранилы быдэ анай-атайёслы но, дышетӥсьёслы но верасько та сярысь. Урокъёс бере арнялы одӥг пол гинэ ке но кружокъёс луысалзы ке, кыӵе пайдаё со луысал нылпиос понна. Туала анай-атайёс кудӥз-огез нылпиоссэс арнялы быдэ Балтасе вуытозь кружокъёсы ветлытэ. Бен ма, асьмеос дышетыны ум быгатысалмы щат? Но та понна нош ик юрттэт кулэ. Нылпиослэн мар карыны ёрмыса ветлэмысьтызы урод сямъёссы кылдо. Тае алон понна дышетӥсьёслэн, анай-атайёслэн огъя ужамзы кулэ луэ. Анай-атай яке нимаз дышетӥсь гинэ та проблемаез сэрттыны-пертчыны уз быгаты. Соос нылпиоссы понна пример луыны кулэ. Тани, кылсярысь, азьло Ципья школаын историяя дышетӥсь луыса ужаз Хамит Мухаматович. Со ачиз но спортэн выриз, нылпиоссэ но спортэ кыскиз. †ошен ветлылозы вал куасэн... Тӥни сыӵе луыны кулэ шуыса малпасько мон — вераськыса гинэ пуконо ӧвӧл, валче кыӵе ке ужъёсты но быдэстоно. Куасэн ветлоно гинэ шуэм кыл но ӧвӧл та. Малпад ке, мае гинэ карыны но радъяны уг луы. Спортэн ӧз выре ке но, таза улон сямез мед валасалзы. Кудӟытӥсь юонъёсты юыса, сигарет кыскыса кыдёке-а мынод? Солы кутэм коньдонзэ кулэ макелы кутысалзы ке, трослы умойгес но асьсэлы пайдаёгес но луысал. Соин но ваньзэсты егитъёсты курисько та сямъёссылэсь куштӥськыны, соос умоезлы уз вуттэ.

— Вераськемды понна бадӟым тау, Роман Валентинович!