Ӵуказе Акашка!

Ӵуказе дунне вылысь вань христиан калык понна тужгес сӥлы карымон праздникез, праздникъёслэсь праздниксэ — Югыт Пасха нуналэз, асьме сямен, Акашкаез — пусъёмы. 

Сое туж вите котькудӥз православной христианин. Котькуд коркан курегпуз буяса дасяло, праздник ӝӧк вылэ пукто кулич, кузятэмлэсь ческыт сиён — пасха, оброс азе интыяло сяськаосын чебермам лыс вайёсты, озьы ик лыс вайёсты ӧс выжыязы но поно. 

Нош кӧня шумпотон кузьма Акашка праздник нылпиослы! Арлы быдэ чидатэк витё соос чебер буям курегпузъёсты, ческыт макеосты люкан нуналэз. Вазь ӵукнаысен ик пиналъёс, чебер дӥсяськыса, гурт кузя курегпуз люканы кутско. Кыӵе шулдыр луэ со вакытэ гуртын! Нылпиослэн шудо куараоссы пилемо нуналэз но сайкыт каро уга! Туала дыре паймымон но ӧвӧл ини, курегпуз люканы гурт нылпиосын ӵош бигер гуртъёсысь пиналъёс но вуыло шуыса. Гурт калык талы шумпотэ гинэ, угось макем тросгес нылпи тон доры пыре, сокем тросгес тон шумпотӥськод. Акашка — со шумпотон нунал, ваньзы та нуналэ шумпото.