Зэмос воргоронлэн адӟонэз

Алексей Степанов — туннэ нуналэ Ципья гуртын улэ, контракт гожтыса, Татарстанысь военной комиссариатын службазэ нуэ, но асьме ёросамы прикомандировать каремын, солэн вынэз — Дмитрий — контрактэ ки нюртыса, озьы ик шаермес утисьёслэн радазы султӥз.

Алексей ожгар зонаен меӵак герӟаськемын ӧвӧл ке но, со вылын туж бадӟым ныпъет — контрактэ ки нюртыны малпам но контракт гожтэм воргоронъёслы ваньзэ пыр-поч валэктон, соосты келян, пытсэт улэ сюремъёсын вераськон, визь-кенеш сётон но дыраз малпамтэ вамыш лэсьтонлэсь дугдытон.

Нош Дмитрий одӥгаз ожгар зонаын тушмонъёсын нюръяське. Кык пиос ик ас дыразы арми службаез ортчизы, соин ожгар ужлэсь инъетъёссэ умой тодо. 

Кызьы нимысьтыз ожгар операци матысь адямиосты пӧртэм музъеме вуттӥз, кыӵе малпанъёс лыктыны кулэ котькуд воргоронлы контрактэ ки нюртон азьын, ма дунне вылын самой дуноез — ваньзэ тае валэктыны тыршоз Алексей Степанов. 

Но азьвыл матынгес тодматскоме семьяен, кытын вордско но быдэ вуо Степанов агай-вынъёс. Юрий но Алевтина Степановъёслэн семьяязы куинь нылпи вордӥське: Алексей, Ольга но Дмитрий. Алексей будэ, атаезлэсь адӟыса пӧртэм ужлы дышетске, азьланяз вынызлы но тодон-валанъёссэ сётэ. Нош Ольга нылзы анаезлэн зэмос юрттӥсез луэ. 
Димаез школаын но университетын дышетскон вакытъёсысен тодӥсько ини, нош Алексеен вераськыны удалтӥз туэ Вукогуртлэн нуналаз. Соку ик ми туж кема вераським удмурт калыклэн «кӧлэмез» сярысь, ёросысь ужрадъёслэн радъяськемзы пумысен но самой валтӥсез — нимысьтыз ожгар операци сярысь. Ваньзэ вераны но гожтыны мултэс луоз, но вераськонмы пайдаё луиз. Пумаз кенешим огдыре эшшо пумиськыса ваньмыз сярысь рос-прос вераськыны но ужпумъёсты пыр-поч эскерыны.

Та вераськонмы бере кык арнялэсь трос дыр ортчиз ини, со вакытэ мон туж трос малпаськи, кыӵе кылъёсын но кызьы Алексейлэн историез пыр, адямиослэн йыразы но сюлэмъёсазы шонер малпанъёс вуттоно, малпаськытоно. Пумиськыса вераськеммы бере, тросэз ас интыяз пуксиз кадь: рос-прос «кушаса» верам индылонъёсыз, визь-кенешъёсыз тӥ понна но пайдаё луозы шуыса малпасько.

— Алексей, азьло ик вера вал, кытысен тон вуид военкоматэ но кыӵе ужъёсты быдэсъяськод?

— 2019 арозь ужай Ципья шоръёзо школаын физической культурая но ОБЖ предметъёсъя дышетӥсь луыса. Татын ик кадетской классэн кивалтӥ. Но пӧртэм мугъёсын сэрен, ӧнерме воштоно луиз. Школаын дышетыку ик гужем каникулъёс дыръя военно-патриотической ӧръя «Романтик» лагерьын начальник луыса ужай. Бератаз ини М-12 трасса лэсьтонэ интыяськи. Татын туж бадӟым нагрузкаос вал, арнялы одӥг пол гинэ бертылӥ: трасса лэсьтӥськемъя азьлань мынӥськод, соин ялан ужан инты воштӥське, дор палъёслэсь но кемалы люкиськоно луылӥз. Соку Вукогуртын улӥськом вал али. Йырам малпанъёс кылдӥзы: тани Дима бертоз гуртэ, семья бадӟым, сузэре но семьяеныз Вукогуртын улэ, мар ке кароно, азьлапалан улон сярысь малпаськоно. Кӧня ке люкам коньдон вань вал, Ципья гуртэ интыяськоно карим. Семьяын ӵемгес луон понна матынгес уж утчано луиз, та вакытэ ик мобилизация кутскиз, ёросысь военкоматэ ужась кулэ шуыса объявление адӟи но мынӥ, контрактэ ки нюртӥ. Туннэ нуналэ мон контракт амалэн ожгар службае быръёнъя пунктысь инструктор (инструктор пункта отбора на военную службу по контракту) луисько. Вань келян ужъёсын, военной часте мынытозь сопровождениен выроно луэ. Ужасько Балтась, Атня но Арча ёросъёсын. Та «пӧсь» дыре уй но нунал кытчы ке бызьылоно, ветлоно. Тани 1 гудырикошконысен отпуске кошконо вал, но, шӧдемея, шутэтскыны дыр уз луы. Ӵукнаысен ӝытозь заявкаосты учконо, собеседование ӧтчано, эмтодос эскеронэ лэзёно, куддыр уйин но документъёсты дасян понна пуконо луылэ. Но ужлэн сыӵе аспӧртэмлыкъёсыз мон понна тодмо луизы, соин ӝожтӥськыны дыр ӧвӧл.

Зэмзэ но, Алексейлэн ужез туж кысык. Вераськыкумы гинэ но ӝыны час куспын кӧня пол жингыртӥзы меда. Нуналаз 50 жингыртӥсьёс луизы ке, удалтӥз шуыны луэ, пе. Нош соослы ваньзылы дыр шедьтыны кулэ ук. Кемалась ӧвӧл со одӥг арня пала Украиналы матын луись территориосын командировкаын луэм, нош туннэ (вераськонмы 29 пӧсьтолэзе вал) выльысь Арча но Казань палъёсы кошкоз. Контрактэ ки нюртыны шуыса лыктэмъёслы со котьку маин ке юрттыны тырше: кинлы ке Таджикистан палъёсты дэмла, кинэ ке Мурманск улосвылъёсы ыстэ (вань сыӵе военной частьёс, кудъёсаз нимысьтыз ожгар операци мынӥсь зонае уг келяло), нош куддыр матысьёссэс шедьтыса, соос доры келя. Котькуд адямилы нимысьтыз саклык висъяны тырше. Сюрес вылын пӧртэм учыръёсын но пумиське. Куддыр адями мынон сюресаз гинэ валаны кутске, кытчы со гожтӥськиз. Но сюрес вылын тросэз эшъясько. Собере ожлудын но ӵош нюръясько.

— Малы воргоронъёс туннэ нуналэ контрактэз капчи коньдон басьтон сюрес шуыса лыдъяло?

— Асьмеос пумозяз ум валаське, мар отын лэсьтӥське. Котькуд мылкыд карись воргоронлэсь куинь пол юасько: «Тон ас мылкыдэдъя, валаса кошкиськод-а?» Малы ке шуоно пӧртэм югдуръёс пумисько. Собере гинэ вань кулэ луись документъёсты дасяны кутскиськом. Адямилэн котькуд лэсьтэм вамышаз быръёнэз вань. Соин татын дас пол малпаськоно, шудон уж ӧвӧл со. Кошкиськод бере, вань шуг-секытъёслы, кышкытъёслы дась лу. Коньдон пумысен верано ке, со адямилэн малпамезъя, инбамысен огшоры кияд уг усьы. 1500000 манет тыриське, куке тон военной часте вуиськод. Но татын малпаськыны кулэ: сыӵе дунэн адямилэсь огдышем улонзэ воштыны луэ-а? Нокыӵе бадӟым коньдон адямилэсь улонзэ но семья шудбурзэ уз вошты. Кыӵе гинэ куанер условиосын тон уд улӥськы, тон тодӥськод семьяед доры бертод шуыса. Со самой валтӥсез, куке тон котькуд нунал матысьёсыдлэсь серекъямзэс но ымныръёссэс адӟыны быгатӥськод. Мае ӵектыны луэ: контрактэ ки нюртон азьын вераське контрактникъёсын, мобилизацие сюремъёсын, потэ меда соослэн отчы берытскемзы, капчи-а отын соослы. Самой кышкыт интыосын луэм ожгарчиос одно ик зэмос югдурез вералозы но пуштроссэ валэктозы, кыӵе со ожлуд но ожгар уж.

Степановъёслэн покчи пизы Дмитрий контрактэ ки нюртыса шаермес утьыны кошкиз. Одӥг толэзь учебкаын луыса, туннэ со зэмос ожгарчи луэ ини. Солэн отысь улон-вылонэз сярысь агаез тодыны тырше. «Котькуд нунал вераськыны тыршиськом ини. Ас мылкыдэзъя кошкиз, мон татын солы пумит нокызьы мыныны уг быгатӥськы», — вера Алексей вынэз сярысь.
Алексей но Дмитрий али ог-огзылэсь сюрс иськемъёсын. Алексей тынӥсь интыын, семьяезлы матын ке но, пӧртэм учыръёсын пумиське, кыдёкысь шаеръёсы но вуылэ. Дмитрий — ожгар операци зонаын, солэн улонэз котькуд нунал кышкытэн герӟаськемын. Таӵе юн мылкыдо, кужмо пиос луыса, оскон кылдэ: шаермы оскымон киосын, калыкмес утьыны зэмос воргоронъёс вань на. Азинсконъёс тӥледлы, пиос! Ӝоген вань шуг-секытъёс пыр потыса, каньыл улонэ берытскыны мед быгатомы!