"Сөенеч" балалар бакчасы әкият бүләк итте (фото)

Ильнур, 5 гыйнвар 2017 - 14:27

2592

Балтач бистәсенең 5 номерлы "Сөенеч" балалар бакчасы коллективы бакчага йөрүче сабыйларны быел аеруча да сөендерде.

"Сөенеч" балалар бакчасы әкият бүләк итте (фото)

Биредә атна дәвамында бер-бер артлы узган чыршы бәйрәмнәрендә балалар һәм аларның әти-әни, әби-бабайлары өчен театральләштерелгән тамашалар күрсәтелде. Ә артистлар ролендә тәрбияче апалары булды. Тәрбиячеләрнең үз рольләрен шундый зур осталык белән башкардылар.

Маша белән Аю, Кыш бабай һәм Кар кызы, Убырлы, Лунтик, Маймыл, Әтәч һәм башка бик күп башка геройлар балаларның күңеленә хуш килде. Балалар яратып караган әкият һәм мультфильм геройлары белән аралаштылар, чыршы тирәли җыр җырлап әйләнделәр, төрле маҗараларга "юлыктылар", шаярдылар, көлделәр...

Шундый бүләк ясаганнары өчен әти-әниләр комитеты бакча коллективына, яңадан-яңа һөнәрләргә өйрәткәннәре, җыр-биюгә сәләтләрен ачканнары өчен барлык тәрбиячеләргә һәм аларның ярдәмчеләренә, аеруча да сәнгать җитәкчесе Уралия Йосыповага ихлас рәхмәтләрен белдерә. Яңа еллар белән котлый!