Туган ягым...

Туган ягым

Гүзәл минем туган ягым,
Иркен басу-кырлары.
Болыннарда гөрләп үсә
Чәчәкләре, гөлләре.
Иртә-таңнан уяналар
Тургай, сандугачлары.
Тирә-якны моңга күмеп,
Җырлый сайрар кошлары.
Арган тәнгә сихәт бирә
Саф сулы чишмәләре.
Рәхәтлек бирә күңелгә
Искән назлы җилләре.
Агачлар да шаулап үсә 
Калын урманнарында.
Мәңге бергә яшик, дуслар,
Гүзәл туган ягымда.

Бәхетле яз

Кояш карый бүген үзгә,
Бит очларын назлап сөя.
Өздереп үзәкләрне,
Ашкындырып йөрәкләрне,
Язлар килә, язлар килә!
Күкне айкап очкан кошлар
Сәлам биреп канат кага.
Җанландырып тереклекне,
Назы белән күренекле
Язлар килә, язлар килә!
Шаулап искән көньяк җиле
Бүләк итә безгә назлар.
Күптән инде зарыгып көткән,
Килер диеп өмет иткән
Язлар килә, ямьле язлар!

Ана сагышы

Көтә ана «Балам кайта», диеп,
Чәчәкләр дә җыйды болыннан.
Тик нигәдер җыйган чәчәкләре
Коелмакчы була кулыннан.
Болыннарда чәчәк бик күп үсә:
Сары, кызыл, миләүшәләре.
Әнкәемне сары сагыш баскан
Бите буйлап тама яшьләре.
Кыенсынып килде кара болыт,
Килде дә ул никтер туктады.
«Газиз балам... Газиз балам...» — 
                                          диде ана,
Һәм яшьләрен коеп сыкрады.
Шаулап алды болын һәм туктады,
Ак куллардан чәчәк коелды.
Яңгыр тамчылары кайгы булып
Ана йөрәгенә уелды.

Альбина Бариева,
Балтач урта мәктәбенең озайтылган көн төркеме тәрбиячесе